East Bengal an tlawm leh tawh

I League nomawi chawi tum East Bengal-in chak hmel an hmu thei lo - a zawna a vawi thum nan league match-ah an tlawm leh ta a, champion beisei ngam a harsa tawh hle.

East Bengal hian Thawhlehni zan khan Minerva Punjab an mikhual a, hnehna chang ngei tura beisei an nih laiin 0-1 in an tlawm a, minute 77-naa William Opoku goal khung chu a chhanletna tur an nei thei lo. 

Kolkata club coach Alejandro Menendez chuan Aizawl FC ang thoin Minerva lakah pawh referee a dem a, "Referee aṭangin thutlukna duhawm lo tak kan hmu a, kan tan a pawi a ni," a ti. 

East Bengal coach hian captain Lalrindika Ralte chu bench-ah a dah a, season hmasaa Minerva tana khel Kassim Aidara chu Didika aiah hian a luhtir thung.

R. Laldanmawia aiah Brandon VL Remdika luhtir a ni a, Armed Veng tlangval Lalramchullova'n captain armband hrengin Minerva a hmachhawn a, Mizo player panga zinga pahnih inlanin an team an chhan thei lo. 

East Bengal hian second half-ah Jobby Justin hmangin chance ṭha an nei a, mahse linesman-in offside a phar avangin Indian striker hian a hun ṭha neih a chhawr thei lo. 

Spanish coach Alejandro chuan, "Goal a luh hmain Jobby hmangin hun duhawm kan nei a, mahse linesman-in offside a phar si. Thutlukna dik lo tak a ni a, Minerva lahin an hun ṭha neih chhunah an rawn khung mai si," tiin a lawm lo hle.

East Bengal hian league match nga an khelh tawhah vawi hnih chiah hnehna la changin vawi thum an tlawm a, Inrinni zana Gokulam Kerala an hmachhawn hunah fan-ten an insiamṭhat an beisei ang. 



Share this Post

Login to comment
No Comments