Mangṭha Gauti - I hun a thleng ve ta

Indian batsman ropui Gautam Gambhir chuan cricket a chawlhsan thu a puang ve ta a, cricket inelna hrim hrimah a hmel kan hmu tawh dawn lo - kum 37 mi niin a bat a tung ve ta. 

India tana 2011 World Cup nomawi chawitu chuan, "Chunglamah khian ka zinkawng ziaktu chu a awm a, mahse tunah chuan pen tuiin a daih seng ta lo niin a lang," tiin cricket khawvel a mangṭha thu a puang. 

A phu ang tawka fak hlawh lo tia sawi ṭhin Gambhir hian Ranji Trophy-ah Ningani khian Delhi tan Andhra Pradesh a hmachhawn ang a, hei hi cricket khawvela a match hnuhnung ber tur a ni tawh ang. 

Gautam Gambhir hian thui takin cricket a chawlhsan thu hi ziakin a pholang a, a tawpah "Batsman ka nihna angin timing hi ka ngai pawimawh em em a, ka chawlh 'timing' hi a fuh ka beisei. In chungah ka lawmin duhsakna ka hlan che u a ni - Gautam Gambhir, cricketer chawl ta," tiin a ziak. 

Sulhnu ropui chu

Delhi tlangval hian India tan test match 58-a khelhah run 4154 vaw chhuakin 41.95 chu a average a ni a, ODI-ah match 147 khelin run 5238 a vaw chhuak a, 39.68 a average niin T20 international-ah match 37 khelin run 932 a vaw chhuak thung. 

First class cricket-ah vawi 42 ngawt century a vaw chhuak a, Indian Premier League-ah Kolkata Knight Riders kaihruaiin kum 2012 leh 2014-ah te nomawi a chawipui a, IPL-a a season tawp ber kuminah erawh Delhi Daredevils tan a khel. 

Kum 2011 World Cup-a India an champion ṭum khan player pawimawh niin final boruak sang takah run 97 ngawt a vaw chhuak a, India-in World Cup nomawi a chawi phah ti hiala sawi ngam a ni. 

World T20 final-ah kum 2007 khan India leh Pakistan intawngin Men in Blue hi a champion pui leh a, he inkhelah hian run 75 vaw chhuakin India champion nan a thawhhlawk hle. 

Mimal ropuina

Kum 37 mi left-handed batsman hi kum 2009 khan ICC Test Player of the Year-ah thlan a ni a, Gambhir chuan he chawimawina chungchang hi sawiin," Lungsi takin ka thlek vawng vawng ṭhin a, ka ngaihlu em em a ni," a ti.

Gambhir hi kum 2011 IPL player auction-ah khan club tin deuhthawin an tana khel turin an duh a, a tawpah Kolkata Knight Riders chuan dollar maktaduai 2.4-in an chang - a hunlaia IPL-a player hlawh hnem ber a ni hial. 

Mahse, a kumin tam lam a pan ve ṭan avangin beisei angin Gambhir a khel chhuak reng thei lo a, kum 2018 IPL-a Delhi-in an leina nuai 280 chu tam tak angin lang mah se kum 2011 lawka dollar maktaduai hnih chuang hlawhtu batsman tan erawh a tlem tih loh rual a ni lo. 

Gambhir chuan a ṭhat tawk tawh loh avanga chawl a nih thu in pha loin, "Hmana ka thinlunga thusawi ṭhintu, 'Gauti a tawk ta e' titu kha hneh let tumin ka bei ṭhin a, ka hneh ṭhin. Mahse, tunah chuan a tawk ve ta takzet a ni," tiin a vanglai a liam tawh thu a pha lo.

Mangṭha Gauti

World Twenty20 2007 leh kum 2011 World Cup-a India champion nana player pawimawhin chawlh a puan meuh chuan cricketer ropui te pawh an insum reng thei lo.

Sachin Tendulkar chuan, "Career duhawm tak i hman avangin Gambhir ka lawmpui che. Player talent nei ṭha tak, World Cup nomawi kan chawi theih nana player pawimawh chu i ni," tiin a ṭhianpa hi a thlah.

Indian batsman hriat hlawh Suresh Raina chuan, "Khelmual khata hun kan hmang thei kha ka tan chuan chawimawina ropui tak a ni, " a ti a, Indian bowling legend leh India coach hlui Anil Kumble chuan, "Indian cricket tana i hnathawhte kha ka chhuang takzet a ni," a ti ve thung.

Bollywood actor ropui leh KKR neitu zinga mi Shah Rukh Khan chuan, "I hmangaihna leh hruaitu ṭha tak i nihna avang khan ka lawm em em a ni, ka captain," tiin a thlah a, politician lar Shashi Tharoor chuan, "Fak hlawh lo batsman, captain fing leh ngaihtuahna sen thiam tak a ni," tiin a thlah thung.



Share this Post

Login to comment
No Comments