PSG inkhelh hun an sawn

Tun hnaiah France ramah tuialhthei chhiah (tax) a sang a, sorkar thil tih duh lo hian mitam takin an dodal. Inrinni zana Paris St-Germain leh Montpellier ten Ligue 1 match an khelh tur pawh a hun sawn a ngai hial.

France ramchhung hmun hrang hrangah chhiah sang duh lohna an lantir a, a bik takin khawpui ber Paris-ah an che nasa zual. Tun kar tawp hian nasa leh zual zawkin an duh lohna lantir an tum, hei vang hian tualchhung buaina chhuak thei thil venthawn thuah inkhelh hun hi sawn a ngai a ni.

PSG hian an khelmuala an match hmasa ber tur an khelh rih dawn tak loh avang hian, an match hmabak pahnih chu khualmualah an khelh a ngai dawn. Nizan khan league match khel tura Strasbourg an tlawh bakah December 11 khian Red Star Belgrade nen Champions League an khel ang.

French champion PSG manager Thomas Tuchel chuan, "Inkhelh hun an sawn hi kan pawm, match dang atan kan inbuatsaih a ngai tihna a ni mai. Venhimna hi kan ngai pawimawh tur a ni," a ti. PSG te bakah hian Lyon leh Toulouse te inkhel tur pawh sawn a ni bawk.

Lyon neitu Jean-Michel Aulas chuan, "Hun tepter tawh taka inkhelh hun sawi a ngai hi a pawi, chutih rualin kan dan theih loh thil a thleng a nih chuan kan pawm thiam tur a ni. Mahse, club tin hi kan buai em em a, a bik takin European football khel kan buai zual, hemi nia inkhel tur zawng zawng sawn ni se a fuh ang," a ti.



Share this Post

Login to comment
No Comments