I hriat ngai loh Cameron Anderson

Mizoram Super League chungchang i hre bel viau a ni thei a, champion lai Zarkawt BCA chanchin pawh hrilh nawn i ngai kher lo ang. Mahse, hei erawh i la chiang tawk lo mai thei; tu nge Cameron Anderson? MSL tihmuhnawmtu leh boruak siam nungtu langsar a ni.

Zarkawt BCA hian MSL-3 champion Mission Veng Vikings hnehin a season zawnin final an lut a, Khatla TBL hnehtu Tuikual South nen nomawi an inchuh dawn. Final game 1 hi December 11 atan ruahmanna siam ni mah se hemi ni hi 'inthlanpui vote chhiar hun' a nih avangin December 10 zan dar 8:00-ah sawn hma a ni a, Kohhran ṭhalai inkhawm zan a nih avangin inkhelh hun hi dar 8:00-ah sawn tlai hret a ni bawk. Game 2 hi December 13 zanah an khel ang a; game 3 khelh a ngai a nih chuan nih chuan December 14 zanah khelh a ni ang.

Double-Double

Basketball huangah chuan inkhel pakhatah point 10 chuang an score bakah, rebounds emaw assist vawi 10 chuang bawk an neih hian 'double-double' tia sawi a ni ṭhin, player langsar leh ṭha bik tan lo chuan neih mai theih a ni lo.

Mizoram Super League semifinal game 1 an khelh dawn khan Virginia, US aṭangin Cameron Anderson a rawn thleng a, ni khat em pawh hahchawlhna hun a neih hmain Mission Veng Vikings a hmachhawn nghal!

Feet 6 leh inches 8 zeta sang Anderson hian Vikings laka a game hmasa zawkah point 24 a neih bakah rebounds 10 leh block vawi li a nei bawk - inkhel boruak san vanglai taka Vikings thiampuipa Dijon Najee Farr-a basket neih tur a block chu boruak inlumlehna chhan pakhat a tling.

Game 2-ah pawh Anderson hi dan theih a ni lo, quarter hmasa berah awltir ni mah se a luh chinah inkhel boruak a thlak thleng dawrh. Quarter hmasa bera 14-14 an nihpui Vikings chu quarter hnihnaah point nei miah loin an siam thei, he inkhelah hian point 32 a score bakah rebounds vawi 13 lain block ṭum hnih a nei leh bawk.

Zarkawt BCA coach Lalruatfela chuan, "Anderson hi chu khawi hmunah pawh a hman theih, tawnhriat la ngah vak lo mah se Europe-a inkhel tawh a nih avangin inrintawkna a ngah hle. Point neih hnem hrim hrim aia ṭhiante tana khelh nuam ti mi a nihna hi kan ṭhatpui," tiin Vanglaini a hrilh.

Dunk!

Mizoram Super League semifinal inkhel pahnih a hmachhawnah Cameron Anderson hi Player of the Night atan thlan a ni ve ve a, a hlauhawm zia chu Mission Veng Vikings player-te zawh mai pawh a finthlak mai thei.

American forward hian basketball khel thiam palian tak tena an tih ṭhin 'Dunk' pawh a theihzia lantir nan Vikings player Lalruatkima ching takin a dunk khum tawh. Thil ho te anga lang, awlsam si lo 'Free Throw' pawh a thiam; vawi 11 a theh tawh zingah ṭum kua a lut - match hmasa zawkah phei chuan vawi li a hmuh a lut vek.

A player chungchang sawiin Afela chuan, "Ruihtheih thila fihlim, mahni invawng tak a nih avangin thawhpui a nuam. Mizoram boruak nuam a ti a, inbuatsaihna hun a neih hnem tawh avangin match hmasa aiin a ṭha zual zawk tura ngaih a ni," tiin a sawi.



Share this Post

Login to comment
No Comments