Thla ruk chhung chawl tur Rafinha

Barcelona midfielder Rafinha chu a khup hliam avangin thla ruk tal a chawlh a ngai dawn a, season hmasa Inter Milan lama loan-a hun hmangtu hi tun season-ah a hmel kan hmu tawh lo a nih pawhin a mak lo ang. 

Kum 25 mi midfielder hi Atletico Madrid nena La Liga-a an inhmachhawn ṭum khan hliam avangin lakchhuah a ni a, a hnu match hnih an khelhah pawh inlan thei loin a awm a, a chawlh chen tur erawh a chiang lawk thei lo. 

Mahse, nimin khan Barcelona chuan thuchhuah siamin uluk taka zirchian a nih hnuah an midfielder chuan thla ruk tal chawlh a mamawh tih an hmuhchhuah thu an sawi a, a khupa hliam vawi thum a neihna a ni ta. 

Brazilian midfielder hian kum 2015 khan a khup ding lamah hliam a lo tuar tawh a, nikum khan a khup hliam vang bawkin thla sarih a lo chawl tawh bawk a, tunah thla ruk a chawl leh dawn ta - a vanduai hle.

Rafinha hi Barca player pawimawh tia chhal tur erawh a ni hran lo. Tun season-ah La Liga match nga khel tawhin Champions League-ah match hnih a inlan tawh bawk.



Share this Post

Login to comment
No Comments