Tlai dar 2:30-ah Chanmari Vs Ramhlun N

Mc Dowell's No.1 Soda Mizoram Premeir League Season 7-ah round 11 khelh zawh tawh a ni a, round thum chiah khelh hmabak a awm tawh chungin semifinal khel tur pali zinga pathum a la chiang lo a, relegate tur a la hriat loh bawk. Vawiin tlai dar 2:30 hian Chanmari FC leh Ramhlun North an inkhel dawn a, CFC coach Chawngthansanga chuan tlai inkhel tur hi an tan a pawimawh em avangin 'quarterfinal' ang hiala an ngaih thu a sawi.

Quarterfinal maw?

Knockout inelnaah chuan quarterfinal zawhah semifinal a awm a, MPL-ah chuan league round khelh zawhah semifinal a awm. Tunah hian match thum khelh tur la awm mah se coach Chawnga thlirna aṭanga chuan Chanmari hian point thum an hlawhchhuah theih loh chuan semifinal luh beiseina a chau dawn tihna a ni.

Chanmari tana harsatna belhchhah turin Electric Veng FC nen an inkhelh ṭumin winger Lalmuanzova leh defender C. Lalrosanga te chu hnawhchhuah an ni a, defender Lalmuanawma (C. Muana) pawhin yellow card vawi li hmuh tawh vangin Ramhlun North a hmachhawn thei dawn lo. 

Chawnga chuan, "Player pawimawh vek an ni a, chutihrualin Dampuia leh Jeremy te an awm tho avangin goal nawr kawngah chuan kan buai phah lo ang. Amaherawhchu Rosanga leh C. Muana te an awm loh rual dawn avangin tlarhnung lam erawh ngaihtuahna sen a ṭul ang," tiin a sawi a, Chanmari boss hian tawnhriat nei ṭha Rochhingpuia a pawt let dawn nge Republic Veng rawlthar duhawm Lalmuawnawma (Munez-a) a rin zawk dawn tih a la sawi thei lo.

Ramhlun North hi...

Ramhlun North chung chiaha awm chu Chanmari hi an ni a, relegation playoff pumpelh an duh a nih chuan an elpui hi an hneh a ṭul. Club secretary Lalenghluna (Maenga) chuan, "Semifinal luh theih kan inbeisei tawh lo a, amaherawhchu kan tum chu relegate playoff pumpelh a ni a, kan thei ta lo a nih pawhin relegate loh kan duh. Kan hnuai chiahah BVT awm mah se kan khelh hmabak Chhinga Veng hi semifinal lut tawh an ni a, Chawnpui pawh MPL club thar an ni ve a, hlauhthawnna tur a awm lo," tiin pressure an neih loh thu a sawi.

Ramhlun North hian MPL7-ah foreigner pathum an kawl a, tunah chuan pahnih Musa Bamba chiah an kawl tawhin ani pawh hi match hnuhnung berah bench-ah dahin Mizo hlangin hnehna an chang. Mizo hlanga an khelh hian khelmualah an inlungrual zawk a, an thawkrim tlang a, table-a an dinhmun a ṭha lo chungin 

ṭantu an nei ṭha a, hei hi Mizoram Police 'kim' an hneh theih chhan a ni.

Engtin zel?

Chanmari hian Chawnga hnuaia hnehna an chan hmasa ber ni turin match hnuhnung berah Electric Veng an hneh a, an phur lai tak ni. Ramhlun North pawh chak zo hlim an nih avangin an intawn hmasak zawka 2-0 a an hneh tawh loh Chanmari hmachhawn turin an inpeih.

Round 12 inkhel tur hian MPL tawp lam a hril dawn a, round pawimawh taka match hmasa ber an khelh dawn avangin midang result an ngaichang hman dawn lo a, chuvangin point thum hmuh tumin khelmual an lut ve ve dawn tihna a ni a, attacking game leh inkhel boruak sang a beisei theih ang.



Share this Post

Login to comment
No Comments