Serbia-ah Liverpool an mualpho

Liverpool-in Group C-ah hmahruaitu niin, an last 16 zinkawng tih awlsamna remchang nei mah se Red Star Belgrade lakah 2-0 in an mualpho a, Group C a ngaihnawm sawt. 

Reds-in hnehna an chan zawh loh zanah Napoli leh Paris Saint-Germain an inhnehtawk ve bawk a, he result avang hian group C-ah hmahruai fal thei tumah an awm lo.

Napoli leh Liverpool ten point ruk ve ve an nei a, PSG-in point nga an nei a, he group-a 'point box' tura ngaih ber Red Star Belgrade pawhin a mawngphaha awm chungin point li an nei!

Team paliin last 16 lut turin beiseina an la nei vek tihna a ni a, mawngphaha awm chungin Champions League an mangṭha thei vek a, hmahruaitu an ni thei vek bawk. 

Barakhaih!

Red Star khelmuala inkhelah rin loh takin mualneitu team an hlauhawm zawk a, team hmuhnawm tia sawi ṭhin Liverpool inkhel hmuhnawmna a awm lo - Milan Pavkov chuan mualneitu tean first half-ah goal hnih a khung a, a goal hnihna phei chu goal mawi bik a ni. 

Liverpool boss Jurgen Klopp chuan, "Red Star tan awlsam takin hmun kan siam sak a, game control theihna remchang kan nei fo chungin kan hun ṭha neih kan chhawr tlat lo a ni," a ti. 

Reds hian beisei an phak lo chungin chance nei lo erawh an ni lo. Daniel Sturridge chuan minute 17-na lekah holam takin a hlah a, 80% ball chang chungin vawi hnih ngawt woodwork an tih per bawk. 

Liverpool hian an hmabakah Napoli leh PSG an la hmachhawn dawn avangin kalkawng a harsa dawn tih a chiang a, season hmasa finalist tan group stage-a tlak hi mualphona a ni ang. 

Chak zawk awm lo

Paris khawpuiah Napoli leh PSG an inhnehtawk tawh a, Italy-ah pawh team pahnih thawnthu a danglam tam lo, 1-1 in an inhnehtawk. 

PSG tan Juan Bernat chuan first half hun pek belhah goal hmahruai a khung a, Napoli tan Lorenzo Insigne chuan second half-ah penalty hmangin an si phurh a sut. 

Napoli-in Liverpool nen point ruk ve ve an nei a, mahse Reds nena an intum tawhna en a nih avangin group hmahruaitu an ni mek. Anfield-ah an la len leh dawn avangin an dinhmun erawh la phet leh thei a ni. 

Italian club hi vanduai zawkah chhiar theih an ni. Jose Callejon leh Dries Mertens ten goal khungna remchang tak an nei ve ve a, mahse PSG defender pahnih Thiago Silva leh Thilo Kehrer ten an lo dang hman hram.



Share this Post

Login to comment
No Comments