Aizawl FC leh Neroca inhnehtawk

Nimin tlai khan Aizawl FC-in tun season I League an muala an khelh hmasak berah Neroca nen goal awm loin an inhnehtawk. Mizo club leh Manipur club hian match thum an khelh tawhah chak hmel an la hmu lo ve ve a, point hnih ve ve hlawh chhuak tawhin table mawng lamah an awm.

Bagan draw-tu

Aizawl FC coach Gift Raikhan-a'n Mohun Bagan nena inhnehtawk player-te chungah rinna a nghat a, starting eleven ngai bawk a hmang.

Goalkeeper-ah Gurpreet awmin defence-ah Vanlalduatsanga, Kareem Omolaja, Govin Singh leh Hmingthanmawia (Valpuia) te an intlar a, midfielder laiah Alfred Kemah Jaryan leh Bektur Talgat te inkawpin mual sir aṭanga nawr turin Albert Zohmingmawia leh Lalrinfela te an awm. 

Tlarhmaah Bagan laka goal khungtu Lalkhawpuimawia chu rin nawn a ni a, Kelkang tlangval hi Ansumana Kromah nen an inkawp.

Neroca ve thung

Mizo club-in fixtures hautak zet an neih avangin I League chauha rilru pek an harsat a, an khingpui Neroca pawh player inhliam vangin an buai ve tho. 

Manipur club hian hliam vangin Yusa Katsumi an rawn hruai tel lo a, starting eleven-a an dah tawh Mohun Bagan leh East Bengal defender hlui Eduardo Ferreira chu warm up-naah training-naa a tih nat tawh a malpui hliam a chhuah leh avangin bul ṭan tur zing aṭangin dah chhuah leh a ni.

Amaherawhchu mikhual team-in Italian keeper Mauro Boerchio an chhawr thei tho a, feet ruk leh inches nga zeta sang keeper hian hmun pawimawh a chang.

A goal lo

Aizawl FC-in bul an ṭan chhe lo a, first half bikah ṭum dang zawng aiin midifelder Bektur pawh a khel ṭha. AFC hian hmun hlauhawmah ṭum hnih freekick an hmu a, Bagan laka goal mawi khungtu David Lalrinmuana chu bench-a a ṭhut avangin defender Kareem-a'n pe ve vein goal-ah a chantir thei lo.

First half-a chance ṭha ber chu Alfred-a zawnah a tla a, AFC captain hian hnai tak aṭangin volley mah se Neroca keeper Mauro-a'n a dang hman. Mizo club hian inkhel an thunun hlak tihna erawh a ni lo - mual sir lama awm Albert leh Rinfela te an che thei lo a, I League bikah 'star' forward Kromah-a'n beisei a pha lo takzet.

A goal chuang lo

Neroca zawkin second half-ah bul an ṭan ṭha a, Mizo club an nawr bet vek. AFC keeper Gurpreet Singh-a hmuh tur a tam a, amaherawhchu goal zawna ball a kal meuh loh avangin hna erawh a nei chuang lo.

AFC coach Gift Raikhan-a'n chak tumin bench aṭangin Leonce Dodoz luhtirin Ivorian winger tlan chak zet hian Manipur defender tan buaina a rawn siam a, goal erawh a keng tel lo. Hun tawp lamah David Lalrinmuana rawn lutin Zemabawk North tlangval hian freekick ṭum hnih ṭha takin a pet a, keeper Mauro-a'n a hmasa zawk dan sakin a hnuhnung zawk hi Valpuia'n keeper zawnah chauh a thei a ni.

Chak phu inti ve ve

Neroca coach Manuel Retamero chuan, "Point khatah kan lawm lo. Chak tumin kan rawn kal a, chak pawh kan phu zawkin ka hria. Chutihrualin goal kan khung theih miau loh chuan chak ngaihna awm lo a, insiamṭhatna tur kan nei a ni," tiin Vanglaini a hrilh.

Aizawl FC coach Gift Raikhan chuan, "Neroca keeper Mauro kha danglamna thlentu a ni a, awm lo se chuan point thum kan hlawh theih ang. Kan muala point thum hmuh kan inbeisei nen kan chak zo lo hi a pawi hle," tiin chak an phu thu a sawi ve bawk.

Mipui an chhelo

Inkhel entu hi official record aṭanga a lan dan chuan mi 45,092 a ni a, a tlem lo. Chutihrualin season nena khaikhin chuan mipui an tam tawk lo a, entu lamah hmasawnna tur a awm.

Nimin inkhelah hian Neroca ṭan tura Manipur aṭanga rawn kal supporter-te thawm a ring zawk a, club flag nena rawn thawk chhuakin khualmuala inkhel entu atan chaun an tam tham hle.

Tun Inrinni hian Aizawl FC-in champion lai Minerva Punjab an mikhual leh nghal dawn a, tun hi hnam anga ṭan theihna hun ṭha a ni a. I League inkhel hi national media lamin an ngaihven avangin football kaltlanga India ram mipui thuchah tur nei tan puan chahna remchang a ni thei ang.



Share this Post

Login to comment
No Comments