Chennaiyin an chak ve ta

Indian Super League-ah match ruk ngawt a zawna hnehna an chan zawh loh hnuin Chennaiyin an chak ve ta a, an mikhualna ramah Pune City chu 4-2 in an hneh. 

Chennaiyin coach John Gregory-a'n season hmasaa an champion nana player pawimawh, tun season-a bench lama an hun tam zawk a hman tir Jeje Lalpekhlua leh captain Mailson Alves te inkhel bul a ṭantir a, vanneihna a neih let leh theih a beisei - English coach hian thutlukna a siamsual lo.

Pune City-in minute 19-na lekah Ashique Kuruniyan hmangin hmahruaina goal an khung a, first half-ah goal dang luh chhunzawm lo mah se second half erawh goal surna inkhel a ni thung. 

Hun rei tak chhawr duh a nih loh hnua a rawn kir lehna inkhelah Mailson Alves chuan minute 54-naah si phurh sutna goal a khung a, an goal hnihna tur chu Gregory Nelson tan a siamsak bawk.

South Indian club hian awlsam takin an duhtawk mai lo. Inigo Calderon chuan minute 69-naah goal thumna a khung a, minute thum hnu lawkah substitute Thoi Singh chuan a pet goal ve leh a - Thoi-a goal khung tur hi Jeje Lalpekhlua siam sak a ni.

Pune-in hun pek belhah an mualpho lutuk tur hliah khuh nan Jonathan Vila  hmangin goal khat an khung ve a, awmzia a nei thui tawh lo - Marcelinho chu hun tawp hnaih lamah red card pek a ni bawk.

Chennaiyin tan Jeje leh Jerry Lalrinzuala ten inkhel bul an ṭan a, Laldinliana Renthlei chu bench aṭanga luhtir a ni thung. Pune lamah dan pangngaiin Lalchhuanmawia Fanai chuan inkhel bul a ṭan a, Chhuantea thlak hian minute 78-naah Jakob Vanlalhlimpuia chu luhtir a ni bawk.



Share this Post

Login to comment
No Comments