A chung bera awm tur Arsenal leh Chelsea

Premier League match hau­tak khel zo hlim Arsenal leh Chelsea ten zanin Europa League an khel zui dawn a, English club pahnih hian hnehna an chang a nih chuan an awmna group-ah hmahruaitu nih theihna hun ṭha an nei ve ve a ni.

Gunners hian dar 1:30 hian Emirates Stadium-ah Sporting Lisbon an mikhual dawn a, North London club pakhat zawk Blues erawh BATE Borisov hmachhawn turin Belarus-ah an zinchhuak thung ang - club pahnih hian league lama an chhawr rim loh deuh player an luhtir leh nual ang.

Arsenal dinhmun

Unai Emery enkawlna hnuaiah Arsenal an harh thar a, an match hnuhnung 14-ah chak loh an nei lo; hei vang hian zaninah pawh chak tura rinkai an ni. Europa League-a an match hnuhnung berah Sporting Lisbon hi an hneh tawh a, zaninah Portuguese club hi hneh nawn leh se, an group-a inkhel dangah Vorskla chuan Qarabag lakah hnehna an chang zo lo a nih chuan Gunners hi match hnih khelh hmabak nei chungin a chung berah an awm chiang tho dawn.

Vorskla hian hnehna chang pawh ni se, Ukrainian club tan hian hmahruai theihna kawng a tlem tawh; kualmualah Arsenal hi si hnih faia an hneh a ngai a, an mikhualna ramah bawk Lisbon an hneh a ngai dawn - Emery naute dinhmun a ṭha tawh takzet, match hnuhnung pahniha an hahdam theih nan zaninah squad chhah zawk a hmang a nih pawhin a mak lo ang.

Arsenal keeper Petr Cech a dam tawh a, League Cup-ah chawr ni mah se EPL-ah erawh a la awl, zanin a inlan beisei a ni. Hliam tenau nei Hector Bellerin a inlan a rinawm loh a, Stephan Lichtsteiner, Sokratis Papastathopoulos, Sead Kola­sinac leh Rob Holding te chu tlarhnung luahlum thei tur an ni.

Hremna hmang zo hlim Matteo Guendouzi a inlan leh thei tawh dawn a, ani bakah hian Aaron Ramsey, Mohamed Elneny leh Ainsley Maitland-Niles te tan pawh hmun a awm ang; anni hi an inlan kim thei a nih chuan tun hnaia inkawp fuh tak Granit Xhaka leh Lucas Torreira ten hahchawlhna hun an nei thei ang.

Lisbon-a goal awmchhun khungtu Danny Welbeck tan a pu tihlawm theihna hun ṭha a inherchhuak leh tura ngaih a ni a, tun season-ah Arsenal tan match ngaah chiah inkhel bul la ṭan mah se goal nga a khung bakah assist vawi khat a nei tawh - English striker a luh chuan Alexandre Lacazette a chawl thung dawn.

Spanish manager Emery-a'n hnehna chan ngei a duh dawn avangin Pierre-Emerick Aubameyang pawh inkhel bul a ṭan lo a nih pawhin chhawr theih tura a awm a rinawm a, striker tha ti chak turin Henrikh Mkhitaryan leh Alex Iwobi a la nei bawk.

Portuguese league lama pathumna nilai Sporting Lisbon hian match thum an khelh tawha point ruk hmuin pahnihna an ni mek a, zanin hian khualmualah hnehna an chang thei emaw, point khat chauh pawh an hmu thei a nih chuan knock out round lut turin an dinhmun an sawhnghet thei ang.

Chelsea an him

Group L hmahruaitu Chelsea tan a chung bera awm chiang turin BATE Borisov hnehna a pawimawh dawn. Match thum khelh aṭanga point kua an hmuh tawh avangin knock out stage chu an lut chiang tawhah a ngaih theih, an elpui dangte an la inhmachhawn kual dawn avangin point an la inpaih sak ngei dawn a ni.

Chutih rualin Chelsea mana­ger Maurizio Sarri chuan group match hnuhnung lam khelh hma ngeiin a chung bera awm chian a duh thu a sawi tawh a, hei vang hian zaninah thapui an thawh a nih pawhin a mak lo ang. 

Italian manager Sarri hian an match hmasa lamah pla­yer ṭha ṭhenkhat hah­chawlhtir ṭhin mah se, hnehna chan ngei a duh avangin squad chhah tak a rem zel; an lamah goal khat chiah a la luh avangin an tlarhnung phui chu an innghahna tur a ni leh dawn.

Chelsea hi mel 2,300 zeta thui zin tur an ni a, kar tawpah Everton nen league match an khelh zui dawn avangin Sarri tan player siksawi thiam a ngai hlein a rinawm. Kar tawpa Crystal Palace an hneh ṭumin Eden Hazard a inlan leh thei tawh a, Belgium international hi a hliam dam tawh mah se bench aṭanga luhtir a la ni - zanin chuan an awltir ang.

Tun hnaia khel ṭha chho mek Alvaro Morata aiah Olivier Giroud hmel kan hmuh a rinawm a, France international tan league lama rintlak a nih zia lantir theihna hun a ni dawn; midfielder Danny Drinkwater, Lucas Piazon leh Rob Green te erawh hliam vanga chhawr theih an la ni lo.



Share this Post

Login to comment
No Comments