BCA chak nawn zanah Vikings an zawr

Mizoram Super League champion lai Zarkawt BCA chuan an nomawi kawl lai humhim an tum ngam tih an lantir zel. Thawhlehni zan inkhelah BCA hian vawi hnih champion tawh Khatla TBL chu 98-88 in an hneh a, match hnih khelh tawhah vawi hnih an chak.

Hawla Indoor Stadium, Republic Vengthlanga inkhel dangah MSL-3 champion Mission Veng Vikings-in an boruak neih len lai an chhawm nung thei lo, team huaisen leh inlungrual taka khel Tuikual South lakah 90-59 ngawtin an mualpho a ni.

Zanin dar 7:30 hian a hmun ngaiah Mission Veng Vikings leh Khatla TBL an inhmachhawn zui leh nghal dawn a, player ṭha awmkhawmna; chak lo hlim pahnih inkhel tur hi a hmuhnawm ang - a zawna chak lo zawk nih an duh dawn lo.

BCA an lian

Tualchhung basketball ngainatute zingah Lalrina Renthlei hi tu nge a nih inzawh nawn a ngai lo. Zarkawt BCA player hian Khatla TBL lakah point 26 a score bakah, rebound vawi riat lain assist vawi sarih a nei bawk - team tana player hmuhnawm leh thawh hlawk a ni; Tuikuahtlang tlangval hi player of the night atan thlan zui a ni.

BCA tan Zonunsanga a hmuhnawm bawk, Zonuna hian point 24 a score zinga 18 ngawt chu quarter thumna chhunga a luh a ni a, ani hi inkhel boruak thlak danglamtu leh an kal fal theihna chhan langsar a tling.

MSL season hmasa pahnih champion Khatla TBL-in Veron Young an nei a, ani hian point 34 score-in an match hmasa ang bawkin player mala point nei hnem a ni. Mahse, 

H. Laldinsanga naute hian season dang angin tualchhung player an neih ṭhat tawk loh an tuar mek. Vikings leh Tuikual aṭanga an lakluh Moses Zoremmawia leh Vanchuangpuia ten danglamna an la thlen thei rih lo.

Vikings an zawr

MSL sawi a nih rualin Mission Veng Vikings leh Tuikual South boruak lo neih tawh ṭhin dan rilruah a thar a, eng level pawh ni se team pahnihin chak loh an duh ngai lo. MSL-5 an intawn hmasak berah Tuikual an au ring zawk.

Season dang kan thlir chuan Tuikual hian an elpui team nena khaikhinin state pawn player an nei ṭha tawk lo ṭhin, kuminah erawh Shashank J Rai an nei a, beisei pawh an nei sang. Shashank hian Vikings lakah point 23 score-in player of the night atan thlan a ni; match hmasa zawka chak lo Phengphehlep tan semifinal beiseina a nung thar.

Ronald March aia ṭha zawk tur hial an ngaih Dijon Najee Farr an neih avangin Mission Veng Vikings lamin MSL an nghakhlel a, an beisei ang ngeiin match hmasa berah hnehna a chan pui. Tuikual lakah Farr a khel ṭha tawk lo a, ball pe hnem mah se a hlah hnem. Dijon-a point 25 score hi chak nan a tawk zo lo a, tualchhung player zingah Lalhlunmawia chauh point 10 score tling thei a nih avangin an elpui lakah Vikings an mualpho.



Share this Post

Login to comment
No Comments