Barcelona-in Champions League last 16 lut

Champions League nomawi chawi tum Barcelona-in last 16 lut turin harsatna an nei lo. Thawhlehni zan khan Inter Milan chu 1-1 in an inhnehtawkpui a, match hmabak pahnih la nei mah se knockout round an lut chiang tawh.

Barcelona tan nipui transfer-a an lakluh Malcom chuan a club thar tana a goal hmasa ber a khung a, Inter tan Mauro Icardi chuan an si phurh sutin chak zawk awm loin team pahnih an inṭhen. 

Tottenham Hotspur chuan an mikhual PSV Eindhoven chu 2-1 a hnehin an beiseina an chhi nung thar ve leh a, an chunga awm Inter Milan nen an la intawn leh dawn bawk avangin beiseina thar an nei leh ta hi a awm lo hran lo. 

Inter leh Spurs inhmachhawn tur hi Barca tan erawh lawmna a ni - team pahnih zinga pakhat zawkin point an hloh leh ngei dawn tih a chiang a, team pakhat chauhin Barca an lehpel thei tawh a, hei vang hian Barca hian last 16 an lut nghal.

Barca an thiam

Catalan club-in an thiampuipa Lionel Messi tel loin Inter Milan an hmachhawn a, goal an khung lawk thei lo. Minute 81-naah Malcom luhtir a ni a, minute hnih hnuah a club thar tana a goal hmasa ber a khung zui.

Bordeaux aṭanga Barca pantu Malcom-a'n goal a khung hian hun tawp nan minute sarih chiah a awm tawh a, Spanish champion hian hnehna an chang mai dawn niin a lang hman.

Mahse, Inter-in Nou Camp-a an tlawm hnuah mahni mualah chuan tlawm an duh lo. Goal an chhuah aṭanga minute li hnu lawkah Icardi chuan si phurh sutna goal a khung a, San Siro thawm chu ring tak a ni. 

Barca tan Luis Suarez a hlauhawm tluan chhuak zak a, kum 31 mi striker hian a kum a tam tawh niin media hmaah sawi mah se khelmuala a tal dan en chuan Suarez a la upa lo. 

Spurs tan Kane

Tottenham tan Harry Kane a la danglam lo. English striker hian PSV lakah goal hnih a khung a, Dutch club-in minute hnihna lekah goal hmahruai khung mah se Kane ngam loin an tlawm.

Wembley stadium-a inkhelah PSV tan  Luuk de Jong chuan minute hnihna lekah goal hmahruai a tauh lut nghal a, Spurs fans an hawihai a, manager Mauricio Pochettino-an, 'last 16 lut turin beisei kan nei tlem tawh' a tih chu a takin a lang dawn niin a lang hman. 

Mahse, mangan niah Spurs chhan turin Kane a inlar a, minute 78-naah an si phurh sutna a rawn khung. Hun tawp nan minute khat chiah a awm tawh tihah Kane bawkin a khung leh a, Spurs an chak!

Harry Kane-a'n a club tan Champions League match 14-a inlanah goal 12 a khung tling ta a, English striker-in sawisel tawk ṭhin mah se Spurs tana a ṭangkaina hmuh hmaih 'luih' a harsa ṭhin.

Beiseina thar chu!

Totttenham-in PSV lakah hnehna an chan avangin an chung chiaha awm Inter Milan chu point thum chauhin an thlau tawh a, Italian club hi an la tawn leh dawn avangin beiseina an nei. 

Spurs manager Pochettino chuan, "Inter kan hneh theih chuan point sarih ve ve kan nei dawn a ni. Barcelona an la awm bawk a, mahse Nou Camp-ah pawh hnehna chan kan tum ang," a ti.

Hnehna an chan tak avangin Argentine manager-in beiseina thar a nei a, PSV nena an inhnehtawk ṭuma a thusawi nen chuan a dang ta. Poch chuan, "Beiseina sang tak kan la nei a, a eng zawngin engkim hi ka thlir a ni," tiin a sawi.

Poch chuan, "Hma kan sawn zel a, tlawm rilru kan pu ngai miah lo hi kan vanneihna chu a ni a, hei hi kan kal zelna tur atan a pawimawh em em a ni," a ti a, a hlim hle.



Share this Post

Login to comment
No Comments