Match thum chak zawn India

Lalremsiami Hmar telna India U-18 Women’s Hockey team chuan 2018 Youth Olympic Games neih laia match thum an khelh tawhah hnehna an la chang vek, Austria leh Uruguay te an hneh hnuah Vanuatu 16-0 in an sawp.

Thawhlehni zan Pool B match inkhelah India tan Siami hian goal hnih a khung leh a, India vice captain hian match hmasa lamah goal li a khung tawh bawk avangin Youth Olympic-ah hian goal ruk a nei der tawh.

Kolasib tleirawl Siami chuan, "Kum inrual tlang inel kan ni a, kan inkhel pawh a awlsam lutuk lo. Mahse, India hi kan thawhhona a ṭhain kan inman em em a, eng team pawh hmachhawn huphurh kan nei lo," tiin Vanglaini a hrilh.

India-in an sawp Vanuatu hian an match hnuhnung pahnihah goal 32 ngawt an lo chhuah tawh bawk a, India laka an zawr hi a mak hran lo. Nizan khan India hian a thlengtu Argentina an hmachhawn leh a, result kan hre hman lo. An pool match hnuhnung ber atan zanin dar 10:30 hian South Africa nen an inkhel leh ang.

Youth Olympic-a inelna pakhat Field hockey hi 5-a-side tournament a ni a, hmeichhe team 12 inlan tur zingah Asian aṭangin India leh China chiah an tel phak - China hi Pool B lamah an awm thung.



Share this Post

Login to comment
No Comments