Mizoram beisei Olympic medal

India ram aṭanga Youth Olympic gold medal la hmasa ber Jeremy Lalrinnunga chuan a hmachhawp leh hmasa ber chu 2020 Tokyo Olympics a chet ṭhat a nih thu Vanglaini a hrilh.

Mizo mipui chauh ni loin India ramin Olympic medal an beisei a, amaherawhchu kum hnih hnua Tokyo-a inelna neih hnuah chuan medal beisei ngam a la ni lo ang.

India weightlifting coach Vijay Sharma chuan, "Kum 2014-ah chuan Olympic-a medal kan lak beisei theihna sang ber zinga mi a ni ang. Kum 2020-ah pawh midang a elphak ang a, amaherawhchu kum 2024 aṭangin medal chu a beisei ngam chauh ang," tiin medal la tura dawh theih a ṭul tur thu a sawi.

Weightlifting-a India record awm sa chu Snatch-ah Deepak Lather-ah 126 kg (25 December 2015) a chawi a, Clean and jerk-ah Rustam Sarang-a'n 152 kg (9 December 2013) a chawi ve bawk a, lifter hrang pahnih belhkhawm hi 275 kg niin Jeremy chawi zat aiin kg khat chauhin a tam a, Mizo rawlthar hi a kum zat thlir telin hmabak a nei êng hle.

Jeremy chuan, "Tokyo 2020-a chet ṭhat hi kan hmachhawp leh chu a ni a, weight category thlak a nih avangin 67 kg-ah ka insawn a ṭul ang. Category thara che ṭha tur hian ka theihna zawng zawng ka chauh ang," tiin a sawi. Mizo rawlthar hian tun hma zawngin 56 kg-ah a tel ṭhin a, Youth Olympics atan hain 62 kg-ah insawnin a che ṭha nghal. Amaherawhchu, Olympic-ah erawh kum bithliah inelna a ni dawn tawh lo tih hriat a ṭha.

Olympic 2016 khan 62 kg category-ah Colombian lifter Oscar Figueroa chuan 318 kg a chawi a, Youth Olympic-a Jeremy chawi zat 274 kg aiin kg 44 ngawtin a tam a, silver leh bronze latute pawh 38 kg leh 31 kg in a pha lo. Olympic hnuhnung berah Jeremy hi tel se 11-na a ni dawn a, 10-naa awm El Salvador lifter Julio Salamanca chuan 275 kg a chawi a ni.

Olympic 2012, 2008 leh 2004 thlir kirin 300 kg chawi theiin bronze medal an la thei a, gold la tur chuan 320 kg chung lam a ngai dawrh thung. Jeremy hian Olympic medal kawng a zawh chho mek tih chu hai rual a ni lo a, amaherawhchu mimal infiamnaa hlawhtlinna sang ber ang hiala ngaih theih Olympic medal la pha tur chuan kawng a la thui hle.



Share this Post

Login to comment
No Comments