Ka theihtawp a tawk zo lo - Sampaoli

Argentina manager hlui Jorge Sampaoli chuan World Cup khelh zawh takah khan an ram tan a theihtawp a chhuah thu a sawi a, captain Lionel Messi te nen an chungah beiseina sang lutuk chu an zawh loh thu a sawi bawk.

World champion vawi hnih ni tawh Argentina hian group match paltlang mah se, last 16-ah France an ngam lo a, an ram mipuiin beiseina sang tak nen an thlir chu a tawp. France an hneh loh hi Sampaoli-a'n an ram team a enkawlna match hnuhnung ber a ni nghal.

Chile a enkawl laia Copa America champion ni tawh Sampaoli chuan, "Kan zavai khan kan theihna zawng zawng kan hlan a, a bik takin ka ngaihtuahna leh inpekna kha a tawk zo lo.

"A nihna takah chuan kan chunga beiseina awm kha a rit lutuk a, hnehna chan kan tum lutuk khan kan theihna tak pholang loin min nawr chep zawk ni maiin ka hria," tiin a sawi.

Argentina hian an ram Under 20 coach Lionel Scaloni chu an ram senior team enkawl turin an ruat fel tawh a, Scolani hian zanin dar 11:30-a Iraq nen friendly match an khelh tur atan Messi a ko rih lo, Barcelona forward tel lo hian Asian team an tlawh dawn a ni.



Share this Post

Login to comment
No Comments