Bhaker-i'n gold kap chhuak

Youth Olympic Games neih mekah India tleirawlte an chet ṭhat chhunzawm, Thawhlehni khan Manu Bhaker chuan 10m air pistol inkahsiak huangah gold medal a kap chhuak - silai kah bikah India tana Youth Olympic gold la thei hmasa ber a ni.

Buenos Aires, Argentina-a inelna neih laiah kum 16 mi Manu-i hian pakhatna ni turin point 236.5 a hmu a, Russian tleirawl Lana Enina aiin point 0.6 in a sang zawk. Anni pahnih hnungah hian Gorgia aiawhtu Nino Khutsiberidze (214.6 points) a awm ve bawk. 

Haryana tleirawl Manu hian qualifier-ah pawh point 600 hmuh theih zinga 576 hmuin hmahruaitu a ni thei a, inelna tak an neih hnuah pawh a elpui ten hnaih ve viau ṭhin mah se a dinhmun su nghing phak an awm lo.

Tun hma pawhin Manu hian India a lo ti hmingṭha fo tawh, World Cup leh Commonwealth Games-ah gold medal a la tawh a, Asian Games-ah erawh final thleng mah se medal a hlawh chhuak lo thung.

Nimin tlai thleng kha chuan India hian medal panga lain, ram 206 inel zingah palina dinhmun an luah mek. India tan hian Mizo rawlthar Jeremy Lalrinnunga chuan weightlifting huangah Youth Olympic Games bika gold hmasa ber a lo chawi chhuak tawh a ni.



Share this Post

Login to comment
No Comments