Svitolina leh Muguruza an chak

Hmeichhe tennis inelna Hong Kong Open khelh mekah champion thei tura rinkai zinga mi Elina Svitolina leh Garbine Muguruza te chuan Thawhlehni khan an match hmasa ber an khel a, harsatna liantham lutuk tawk loin an tlang.

Seeded pakhatna Svitolina hian a khingpui Priscilla Hon chu 6-2, 6-3 in a hneh a, champion lai Anastasia Pavlyuchenkova a inlan loh avangin nomawi chawi theihna kawng a inhawng zaua ngaih a ni.

Mahse, Ukranian nula hian tun hnaiah beisei a phak lo, Wuhan Open leh Chinese Open-ah te a tla hma hle, tuna an inelna hi China khawpui tho a nih avangin hlawhtlinna chang tur chuan hard court-a chet ṭhat a mamawh.

Grand Slam vawi hnih champion tawh Muguruza pawh a vawi khat nan Hong Kong-ah a inlan, Spanish nula hian a match hmasa berah Sara Sorribes Tormo chu 6-3, 6-1 in a hneh.

Inkhel dangah season hmasa finalist Daria Gavrilova chu chak lo tur anga a lan hnuin Zarina Diyas lakah hnehna a chang let thei a, seeded parukna Wang Qiang pawhin Zhang Ling hnehin; tualchhung nula Zhang Shuai leh Japanese player Nao Hibino te pawh an chak bawk.



Share this Post

Login to comment
No Comments