Incho tawk Electric Veng Vs Police

Vawiin tlai dar 3:00 hian Mc Dowell's No. 1 Soda Mizoram Premier League Season 7-ah Electric Veng FC leh Mizoram Police te Lammualah an inkhel dawn. Team pahnihin point thum an hmu tawh a, point thum inchhuhsak an tum ve ve bawk avangin inkhel nung ṭha tak hmuh beisei theih a ni.

En châkawm chu...

Electric Vengin MPL club an  nih hnua an match hmasa berah Aizawl FC chu I Day Football-ah an hneh a, MPL match hmasa berah pawh I League club nen bawk bul an ṭan. An inkhelh hmain Electric Veng manager Lalchhanhima chuan, "Aizawl FC laka point khat kan hmuh chuan kan lawm ang a, Police nen erawh point thum hmuh kan tum ang," tiin a sawi lawk a, Mizoram Police an hlau lo tih a nemnghet.

Mizoram Police thlir dan a dang bik lo, coach Lalbiaksanga Colney chuan MPL kai thar Electric Veng lakah point hloh a thian loh thu a sawi ve tho. Team pahnih an incho ve ve a, Police-in player hming langsar ngah zawk mah se Electric Veng team balance a ṭhat ve tho avangin chak tur chiang a awm lo.

Team X Ray ila

Mizoram Police hian player 35 an ziak lut a, an player lak 'rinrawl' ni pha turten training an neih mek avangin an la chhawr thei lo. Training zingah season liam taa defender pawimawh Lalhmunmawia a tel a, midfielder ṭangkai F. Zosangliana'n Chhinga Veng a zawm tawh bawk avangin Police tlarhnung a phui lo.

Police tlarhnung hi Bethlehem Vengthlang lakah pawh a phui lo tih a lang tawh a, Electric Vengin a kaw lai hi an hmu fuh a nih chuan BS-a Colney hote hi an buaina ngaiah bawk an buai dawn tihna a ni.

Tlarhma lamah Police an ziaawm a; Lalfakzuala, F. Lalrinpuia leh Lalbiakhlua te chu MPL top scorer ni vek tawh an ni a, Lalsangbera bakah midfield-a inkawp V. Lalṭanpuia leh Lalramtharmawia te pawh Mizoram aiawha khel vek tawh an ni a. Amaherawhchu tlarhnung phui tawk loh vang leh tlan tam tawk loh vangin an ṭhatna hmunah pawh fak chiam tur an ni tawh lo.

Electric Veng erawh team dang daih an ni a, player an naupan tlan avangin an che rang a, an tlan tam a, an la puitlin tawk lohna lang mah se khelh an harsa dawn. Rawlthar duhawm H. Zawnhmingthanga leh Vanlalremkima ten theihna sang tak an nei a, Police player tawnhriat ngah zawk nen midfield-a an in bei tur chu a entlak khawp ang.

MPL club thar Electric Veng hian Aizawl FC hneh mah se I League club hi Mizoram Police nen an danglam tih hriat a ṭha a, an goal nawr dan inang lo tak avangin match hmasa bera an khelh ṭhatna hi match hnihnaah an chhawm ngawt thei dawn lo tih a hriat a ṭha. 

Engtin zel?

Mizoram Police coach BS-a Colney chuan, "Kan defence kha inkhel ṭantirh lamah an chefuh tawk lo a, a tawp lamah chuan a ṭha tawh viau a, kan insiam ṭha zel bawk. Chutihrualin Electric Veng hi an phur lai tak a nih avangin khelh an harsa dawn a, kan fimkhur a ṭul ang," tiin Vanglaini a hrilh.

Electric Vengin I League club an hneh theihna chhan ber chu Isak Vanlalpeka freekick a ni a, hemi chungchang hi sawiin BS-a Colney chuan, "Player-te pawh kan fimkhur a ṭul dawn, a hlauhawm thei chinah chuan freekick chawi loh kan tum ang," tiin a sawi.

Electric Veng manager Chhan Chhana pawhin, "Police hi an fitness a ṭha a, squad nei chhah ber zinga mi an ni a. Chutihrualin an squad pan laia hmachhawn tur kan ni a, kan hman ṭangkai a ṭul a ni. Result ṭha nei tur chuan team inlungrualna bakah vengchhung mipui ṭawiawmna a pawimawh ang," tiin chak thei an nih thu a sawi.



Share this Post

Login to comment
No Comments