Zaninah ADBBA Cup Final

ADBBA Cup 2018 - Zalena Fanai Memorial Trophy final chu Hawla Indoor Stadium-ah khelh a ni dawn. Hmeichhe final-ah season opening-a inhmachhawn tawh LB Associates leh Durtlang Mohicans te chu zan dar 7:00-ah an inhmachhawn ang a, zan dar 8:30-ah Republic VR4 leh Chawn­pui BC ten mipa final an khelh chhunzawm ang.

Bungkawn club LB Associates-in ADBBA Cup final lut turin Team Alpha chu 34-17 in an hneh a, chakna kawngah point 14 neitu Puii a ṭangkai hle. LB Associates hian Season Opening final-ah Durtlang Mohi­cans hi 43-32 a hneh­in an champion tawh a ni.

Mipa semifinal-ah MSL aṭanga tla hlim pahnih inkhelah Repub­lic VR4-in Mission Veng­thlang Hollow BBSP laka an chungnunna an chhunzawm. First quarter-ah VR4-in 26-19 in hma an hruai a, quarter tinah inhnehtawk chhunzawm mah se Republic Veng hi an tawlhthlu duh lo a, Hollow tan thawhchhuahna remchang siam loin 92-85 in an chak.

VR4 hmachhawn tur Chawnpui hian final lut turin semifinal-ah Vanguard chu 56-53 in an hneh. Chawnpuiin semifinal an khelh hmasak zawk avangin ni khatin hahdamna hun an ngah zawk a, team pahnih hi basketball thiam veng pahnih behchhan an nih bawk avangin final hmuhnawm tak a beisei theih ang.



Share this Post

Login to comment
No Comments