Shaw-a'n Watford hmachhawn dawn?

Manchester United defender Luke Shaw chu  Spain nen an inkhelh ṭuma an intauh avangin Football Association danah chuan ni 14 inkhel thei lo tur a ni a, amaherawhchu hemi dan pumpelh dan kawng a awm avangin English left back tan Inrinni zana Watford hmachhawn theih dan a awm.

Kum 23 mi Shaw hi United hnuaia uluk lehzuala inhliam enkawlna 'enhanced care setting' ah dah a ni a, heta medical staff ten khel tlaka an ngai a nih chuan English left back hian Watford a hmachhawn thei ang.

Enhanced care setting ni pha tur hian FA hnuaia dan pasarih a tlin phak vek a ngai a, heng dan zinga pakhat pawh a zawm lo a nih chuan lu a intauh vanga hliam enkawl dan pangngaiin ni 14 chhung a chawlh a ṭul dawn a ni.

United hian Premier League match hmasa berah Leicester City hneh mah se Brighton leh Tottenham Hotspurs te an hneh lo chhunzawm a, an match hnuhnung berah Burnley an hneh thung. League match hmasa paliah hian Shaw hian inkhel bul a ṭan vek a, goal khat khung bawkin ram tana koh a nih phah bawk.

Jose Mourinho naute khingpui tur Watford erawhin bul an ṭan ṭha a, Liverpool leh Chelsea te nen an match hmasa paliah hnehna an chang vek a, United point hmuh zat point ruk hi team pahnih inthlauhna zat a ni tel bawk.



Share this Post

Login to comment
No Comments