Aizawl FC leh Chanmari FC inhnehtawk

Mizoram Premier League Season 7-ah Aizawl FC-in chak an la nei lo a, nimin tlai khan I League club hian Chanmari FC lakah ṭum hnih hma hruai mah se an insuttir ve ve a, 2-2 in an inhnehtawk.

Lammual inkhel hmuhnawm takah Aizawl FC tan Isak Vanlalruatfela a che ṭha a, Thingsulthliah rawlthar hian F. Lalremsanga goal khung tur a siam sak bakah ama pualin goal mawi tak a khung. Isaka hi MPL a khelh hmasak berah man of the match-ah thlan ni mah se C. Lalrosanga leh Lalnunzama te tauh luh hmanga Chanmari FC-in an siphurh an sut avangin an inhnehtawk.

Chanmari captain Rosanga chu minute 73-naah hnawhchhuah a ni a, Chanmarians-in kim loin hun rei tak khel mah se Aizawl FC-in an tam zawkna hi an hmang ṭangkai thei lo.

MPL mi thar Isaka

Aizawl FC-in damlohna vanga Electric Veng hmachhawn thei lo Lalrinfela leh Manipur defender Govin Singh te chhawr thei tawh mah se Chanmari an hmachhawn hnuhnun ber ṭuma hattrick siamtu Lalkhawpuimawia chu training-naah a inhliam vangin an chhawr thei lo.

Gift Raikhan chuan Chanmari FC hmachhawn turin Albert Zohmingmawia leh David Lalbiakzara te aiin Isak Vanlalruatfela a thlang a, a tisual lo. Minute rukna lekah Isaka hian dinglam kilah amah vengtu Champhai tlangval Lalmuanawma kap karah ball thlawh lutin box chhungah a lalut a, F. Lalremsanga hnenah pe lehin Lengpui tlangval hian goal hmahruai khung nan a hmang.

Minute 14-naah Chanmariin an siphurh an sut a, Laldampuia corner pet chu Rosanga'n amah vengtu Alfred Kemah Jaryan lak aṭanga a tal put hnuah chiang zetin a tauh lut. Aizawl FC-in Electric Veng an hmachhawn ṭumin set piece-ah goal hnih an chhuah a, Chanmari lakah an insiam ṭha lo.

Team pahnih an inhnehtawk a, first half-ah Aizawl FC-in chance ngah zawk mah se ball possession-ah chuan an intluk chiah. Minute 39-naah Isaka bawk rawn inlarin minute 39-naah hla tak aṭangin Chanmari keeper MS Dawngliana a pet khum a, Aizawl FC-in 2-1 in hma an hruai nawn chiah bawk.

Zama leh goal

Aizawl FC-in Isaka an nei a, Chanmari FC-in Zama an nei ve thung. Khelo India best player hian Ramhlun North an hmachawn ṭumin a tauh goal tawh a, I League club lakah hian minute 69-naah ding lam aṭanga Thomas Lalengkima cross chu sang taka zuangin a tauh goal.

Chanmari lamin second half-ah Lalmuanzova leh Vanlalbiaa Chhangte te an luhtir bawk avangin inkhel a hmuhnawm sawt a, Aizawl FC erawhin Rinfela an la chhuak a, an goal nawr a nat chhunzawm loh avangin an tifuh tawk loah a ngaih theih.

Minute 73-naah Rosanga'n Remsanga lalut tur a tihtluk avangin hnawhchhuah a ni a, Chanmari hian mak ang reng takin an captain awm loh hnuah an goal nawr a na zawk a, Aizawl FC-in goal hlauhawm an nei zui lo bawk.

Hmabak

Chanmari FC-in match hnihah point li an hmu a, September 20 zanah Bethlehem Vengthlang FC an hmachhawn ang. 

Aizawl FC erawh match hnihah point khat lek an hmu a, an hmabak pawh a awlsam dawn lo. September 21 zanah Mizoram Police nen an inkhel dawn a, MPL round 3-a inkhel en châkawm ber tia sawi theih a ni.



Share this Post

Login to comment
No Comments