Sharapova chak niah Kerber a tla

Maria Sharapova chuan a Russian pui Daria Kasatkina lakah winners vawi 25 hlap chhuakin 6-0, 6-2 in hnehna a chang a, world number 1 hlui hian harsa lo taka Rogers Cup last 16 a luh laiin; Angelique Kerber erawh a zinkawng a tawp thung.

Grand Slam vawi nga champion tawh Sharapova hian hnehna chang turin darkar khat leh minute ruk chiah a mamawh, seeded 12-na Kasatkina laka a chet dan thlir chuan September thlaa khelh tur US Open-ah pawh player hlauhawm a nih phak a rinawm.

Kum 31 mi Sharapova chuan, "Player ka hriatchian tak nen kan inkhel dawn tih ka hriat tirh aṭang khan inkhel a hautak dawn tih ka hre nghal a, nidang anga ka ball vuak na ka neih theih avangin ka dingchang hram," tiin a sawi. Sharapova hian a match lehpekah chuan seeded parukna Caroline Garcia a hmachhawn leh ang.

World number 4 Kerber chu 6-4, 6-1 in Alize Cornet lakah a tlawm thung. German nula hian tihsual a ngah a, vawi 32 ngawt mai unforced errors a neih chu a chak lohna chhan langsar a ni. Cornet hian quarterfinal lut tur chuan Ashleigh Barty a paltlang leh a ngai thung ang.

World number 1 hlui Kerber hian Wimbledon title a lak hnuah a tournament hmasa berah beisei a phak lo leh nghal a, 2016 season anga major title pahnih lak a duh a nih chuan hard court inelna lian US Open khelh hmain a insiamṭhat a ngai dawn.

Inkhel dangah seeded palina leh champion lai ni bawk Elina Svitolina chuan third round lut turin hna hautak a thawh a ngai lo, a khingpui tur Mihaela Buzarnescu  chu ke rek na vangin a inhnukdawk. US Open champion Sloane Stephens chuan Francoise Abanda lakah 6-0, 6-2 in hnehna a chang bawk.



Share this Post

Login to comment
No Comments