Leicester-in defender thar nei

Premier League club Leicester City chuan Dinamo Zagreb aṭangin centre back Filip Benkovic an lalut a, kum nga chhung atana contract ziahpuiin a man zat erawh tarlan a ni lo - pound maktaduai 13 man bawr vel ni tura ngaih a ni.

Kum 21 mi defender hian season hman zawh takah khan Dinamo tan hian inelna hrang hrangah match 30 khelin goal li a khung sak a, league nomawi an chawina kawngah a thawhhlawk hle.

Leicester City manager Claude Puel chuan, "Filip hi player hmabak nei eng tak a ni a, a bik takin Leicester City-ah hian hma a sawn lehzual theih ka beisei. Season thum chhungin Dinamo tan player pawimawh a ni a, kan squad ti chak tur player a ni," a ti.

Foxes hian he thu buatsaih a nih thleng hian Filip bakah Portuguese right-back Ricardo Pereira, Northern Ireland international Jonny Evans, England youth international James Maddison, Wales goalkeeper Danny Ward leh Algeria winger Rachid Ghezzal te an lalut tawh.



Share this Post

Login to comment
No Comments