Celtic an chelh; an dinhmun a him lo

Champions League khelh tum Celtic hmabak a hautak dawn - Nilaini zan khan Champions League qualifying third round-ah AEK Athens chu 1-1 in an inhnehtawkpui.

Team pahnih inkhelhna hmun hi Celtic Park a nih avangin Scottish club tan second leg-ah goal khung ngei ngei a ngai dawn tihna a ni a, mikhual ṭitna hmun Greece-ah an tan hna a awlsam lo ang. 

Celtic tan Callum McGregor chuan minute 17-na lekah goal hmahruai a khung a, mahse first half tawp nan minute khat chiah a awm tawh tihin Viktor Klonaridis chuan mikhual team tan a chhanglet a, phurrit tak nen Celtic a hnutchhiah.

Inkhel chu

Champions League qualifying third round-ah AEK Athens leh Celtic an inhmachhawn dawn tih a chian khan club pahnih hi mahni ram champion ve ve, sulhnu nei ṭha tak an nih bawk avangin qualifier-a inkhel en chakawm ber pawl a ni nghal.

Celtic Park-ah beisei ang ngeiin inkhel boruak a sang a, Kieran Tierney leh McGregor chu Celtic tana player hmuhnawm an ni a, Brendan Rodgers-a nauten an mikhual lakah zahngaihna lantir an tum loh avangin tlarhma lamin an nawr na takzet bawk.

Minute 17-naah Celtic-in an beisei an hmu ta nge nge a, Callum McGregor chuan angle zim zet aṭangin he inkhela goal hmasa ber a khung a, Celtic Park-a mipui thawm chu ring tak a ni.

Mahse maw...

AEK Athens player-te an huaisen a, Celtic Park aṭanga kut ruak maia haw an tum lo. AEK forward Viktor Klonaridis chuan first half tawp nan minute khat chiah a awm tawh tihah si phurh a sut a, away goal a nih miau avangin he goal hi Celtic mangṭhana goal a la ni thei.

Celtic beisei angin thil a kal a, Greek defensive midfielder beiseiawm Konstantinos Galanopoulos chuan minute 57-naah a yellow card pahnihna a hmuh avangin kim loa an khelh chhunzawm a ṭul a, Celtic-in tam zawk an nih erawh an chhawr chuang lo. 

Scottish club tan hian Olivier Ntcham, Leigh Griffiths leh Scott Sinclair ten chance duhawm an nei vek a, mahse an hun ṭha neih hi goal-ah erawh an chantir thei lo vek thung. August 14 zanah Celtic hi Greece-ah an zin dawn a, goal an khung loh chuan Champions League an beiseina a tawp ang.

Rodgers a zam lo

Celtic-in goal an chhuah avangin an hmabak match harsa sawt dawn mah se coach Rodgers erawh a zam phah lo. Liverpool boss hlui chuan, "Zaninah khan eng result pawh hlawh chhuak ni ila, Greece-a inkhelh chu a awlsam dawn lo. Mahse, ka player te hnenah hlauhthawnna tur engmah kan neih loh thu ka sawi a ni.

"Theihtawp kan chhuah a, kan beisei ang result erawh kan nei lo. A bik takin first half kha chu kan thununin ka hria a, ka player ten an khel ṭha hle. A pawi ber erawh a tawp kan khar ṭha thei lo kha a ni," a ti.

Celtic hian inkhel pahnih belhkhawmah hnehna an chang a nih chuan playoff-ah Swedish champion Malmo emaw Hungarian club ṭha MOL Vidi an hmachhawn dawn a, Rodgers chuan, "Ṭha taka kan khelh ṭhin avangin kan inringtawk a ni," a ti a, hlauh a nei lo.



Share this Post

Login to comment
No Comments