Courtois a chhuak; A thlaktu keeper manto ber!

Chelsea-in club training zawm duh lo goalkeeper Thibaut Courtois an chelh zo ta ngang lo a, Real Madrid hnenah pound maktaduai 35-a a kal an remti.

Blues-in Real lakah an keeper neih ṭhat an chan hnuin an awm mai mai bik lo. Athletic Bilbao goalkeeper Kepa Arrizabalaga chu khawvela si ban nghak manto ber ni turin an lalut ve nghal a, pound maktaduai 71-an inseng.

Real lama Courtois kalin nghawng a nei thui. Chelsea-in Kepa an lei bakah Real midfielder Mateo Kovacic chu loan-in an hawh tel bawk a, Croatia international hian Blues tan season khat chhung a khel ang.

Chelsea keeper Courtois 

Real-in goalkeeper an zawnna a rei tawh a, Keylor Navas chungah rinna nghah reng an  harsat. 2016-17 season ṭan dawn khan Manchetser United goalkeeper David de Gea chu lakluh ngei tumin an lo hel tawh a, an inrem hman hnuah lehkha pawimawh an tih fel hman loh avangin Spanish keeper hi an lalut thei leh lo.

Season hmasa ṭan dawnah Zinedine Zidane-a'n transfer bazar boruak a vaw dai a, a player neihsa te an ṭhat tawk thu a sawi avangin Atlaetico Madrid defender Theo Hernández leh Real Betis aṭangin Dani Ceballos te chiah an lalut.

Mahse, season tawp rualin Zidane a chhuak a, Real-in goalkeeper zawn hna an ṭan lehnghal. David De Gea-a'n World Cup-ah beisei a phak loh hnuin Spanish goalkeeper lam an hawi tawh lo a, golden glove dawngtu Thibaut Courtois lam an hawi.

Tichuan...

Kum 26 mi goalkeeper-in Real tana khelh a lo châk si a, Belgium international hian Spain a pan theih nan ni hnih ngawt training a zawm lo hial! Chelsea chuan an goalkeeper hi a hrem nan  £200,000 an chawitir hial.

Tunah erawh Chelsea-in Courtois an chelh thei ta ngang lo a, kum ruk chhung Real Madrid tana khel turin contract a ziak - nimin tlai khan Santiago Bernabeu-ah an player thar hi an tlangzarh nghal a, Blues ban rinawm ni ṭhin hian Real kawr a ha dawn ta.

Belgium tana vawi 65 inlan tawh goalkeeper hian 2011 khan Genk aṭangin Chelsea hi a zawm a, 2011-14 thleng chu Atletico Madrid-ah loan-a khelhtir a ni. Spanish club-ah a hming a chher hnuin 2014 khan Chelsea tan a khel ṭan a, goalkeeper pawimawh ni chho nghalin Premier League (2), FA Cup (1) leh League Cup (1)-ah te a champion pui a, Atletico tan La Liga (1) leh Europa League (1) nomawi a lo chawi tawh bawk avangin Spain-ah a tlangnel nghal ang.

Kepa chu...

Chelsea-in an keeper duhlai Courtois an chan hnu lawkah Kepa chu khawvela goalkeeper manto ber ni turin an lalut ve nghal a, kum sarih chhung atan contract an ziahpui - Liverpool-in pound maktaduai 66.8-a Alisson an leina man chu a khum nghal.

Kum 23 mi goalkeeper hian Spain tan match khat chiah a la khel a, De Gea tluk loin Spanish team tan hian second choice a ni. Athletic Bilbao youth system chhuak hian 2016-ah khan La Liga-ah a match hmasa ber a khel ve chauh a, season hnih chhungin match 54-ah a inlan.

January khan Real Madrid chuan Kepa hi lakluh an lo tum daih tawh a, tuna Chelsea boss ni ta, hetihlaia Napoli enkawltu Maurizio Sarri chuan lakluh tumin a hel ve bawk - Stamford Bridge-ah a hruai thei ta a, mi tam takin 'mangan' vanga lei thuta an ngaih anga lei erawh a ni lo tih a chiang.

Kepa leh Chelsea

Chelsea hian July 2017 khan Alvaro Morata chu pound maktaduai 60-in an lalut a, an club  player manto ber a ni - Kepa hian pound maktaduai 11 ngawtin Spanish striker man zat hi a rawn khum tihna a ni.

Euro Under 19 Championship (2012)-a Spain a champion pui tih loh nomawi la chawi ngai lo goalkeeper chuan, "He club-in nomawi a chawi tawhte, player khel ve te, London khawpui leh Premier League te hian min hip em em vek a, Chelsea-in ka chunga rinna nghata min lalut hi ka lawm takzet a ni," tiin a sawi. 

Chelsea director Marina Granovskaia chuan, "Kepa hi hun rei tak chhung kan lo thlithlai tawh player a ni a, kan club a rawn zawm thei ta hi kan lawm takzet a ni. Chelsea-in kan hma huna hlawhtlinna kan beisei tam takah kan player pawimawh tak a nih kan beisei," a ti.

Kovacic ve thung

Kum 24 mi Kovacic-a'n Chelsea tan season khat chhung loan-in a khel dawn a, club pahnih an inrem fel tawh rualin he thu buatsaih lai hian player erawh tlangzarh a la ni lo.

Croatia tana vawi 46 inlan tawh midfielder hian 2015 khan Inter Milan aṭangin Real Madrid hi a pan a, player pawimawh tia chhal tur em ni lo mah se season thum chhung hian match 109 a khel hman a, goal thum a khung.

Player naupang tak ni mah se tawnhriat ngah tawh player a nih avangin Chelsea tan player ṭangkai tak a nih theih a rinawm - Real tan Champions League (3) leh La Liga (1) nomawi a chawi tawh a, Croatia-in World Cup final an luh khan squad-ah a awm bawk.

Navas a chhuak dawn lo

Thibaut Courtois-a'n Real Madrid a pan avangin Belgian goalkeeper hi first choice a ni dawn tih a chiang a, season thum chhung Real first choice goalkeeper lo ni tawh Keylor Navas chu chhuak tura ngaih a ni.

Mahse, Real tana nomawi chawi theih zawng zawng chawi tawhtu player hian Spanish club chhuahsan a tum lo a, hmun a chan ngei theih nana theihtawp chhuah a thlang zawk.

Kum 31 mi goalkeeper chuan, "Thih ka la chak loh tluk zetin Real chhuahsan hi ka la duh lo," tiin Santiago Bernabeu a chhuahsan dawn leh dawn loh chungchanga an zawhna a chhang a, chhuah a tum lo hle!

Costa Rica tana vawi 83 inlan tawh goalkeeper hian Real tan match 141 khel tawhin Champions League (3), LA Liga (1), Club World Cup (3), European Super Cup (2) leh Spanish Super Cup (1) nomawi te Real tan a chawi tawh.



Share this Post

Login to comment
No Comments