Nadal-a'n last 16 lut

World number 1 Rafael Nadal chuan Benoit Paire lakah straight set a hnehna changin ATP Rogers Cup khelh laiah last 16 a inhlangkai. Nadal hian a match lehpekah chuan Stan Wawrinka a hmachhawn ang.

Nimin zing Toronto-a inkhelah Nadal hian French tlangval Paire 6-2, 6-3 in a hneh a, vawi thum a champion tawhna hmunah hna hautak thawh tur a nei lo.

Grand Slam vawi 17 champion tawh Nadal hian Wimbledon semifinal-a Novak Djokovic a hneh loh hnuah a match hmasa ber a khel leh chauh a, season tawp lama khelh tur US Open atana inbuatsaihna a kalpui ṭan ve chauh a ni.

Kum 32 mi Nadal chuan, "A nihna takah chuan 100% in ka ṭha tawk lo, set hnuhnung zawkah khan ka service a ṭha tawk lo a, mahse ka ball vuak let a ṭhat ṭhin a vangin ka dingchang hram. A bik takin baseline aṭanga ka tihsual tam tak siamṭhat a ngai dawn a ni," tiin a sawi.

Inkhel dangah Djokovic-a'n Peter Polansky chu 6-3, 6-4 in a hneh. Serbian tlangval hian vawi nga a champion tawhna hmunah match hnih a khelh aṭangin set a hloh lo a, quarterfinal lut tur chuan Dominic Thiem hnehtu Stefanos Tsitsipas a paltlang leh a ngai dawn.

Grand Slam vawi 13 champion tawh Djokovic tan kawng a awlsam dawn lo, a chak chho zel a nih chuan seeded pathumna Alexander Zverev nen quarterfinal-ah an inhmachhawn ang. German player hian 6-4, 6-4 in Bradley Klahn a hneh ve bawk a ni.

Mipa singles player langsar dang - Wimbledon pahnihna Kevin Anderson, seeded pangana Grigor Dimitrov, US Open champion hlui Marin Cilic, leh seeded pariatna John Isner bakah Dutch player Robin Haase te chuan round sang zawk an lut bawk.

Hard court-a inkhelh thiam Juan Martin del Potro erawh a ban rek vei lam hliam vangin second round an khelh hmain a inhnukdawk. Argentine tlangval hi Haase nena inkhel tur an ni a, mahse US Open hmain dam fel a duh avangin a inkhel lui ngam lo.



Share this Post

Login to comment
No Comments