LG Independence Cup semifinal Zaninah Aizawl FC Vs Mizoram Police

LG Independence Cup semifinal chu zanin dar 7:00 hian Lammualah khelh a ni dawn a, Aizawl FC leh Mizoram Police te an inkhel dawn. Naktuk zan hian semifinal hnuhnung zawkah champion lai Chhinga Veng leh MPL kaithar Electric Veng te an inhmachhawn ang.

Zanin inkhel tur hi an player theihna thlir chuan final-a inhmachhawn atana awhawm an ni. Aizawl FC hi season liam taa I League best coach Gift Raikhan a enkawl an nih bakah tun inelnaa foreigner nei awmchhun an ni a, Mizoram Police hi tualchhung player ṭha awmkhawmna tiha sawi theih an ni thung.

En châkawm

Aizawl FC-in Electric Veng hneh loa bul an ṭan hnuah harhtharna dik an chang a, an khingpui dang Chanmari, Ramhlun North leh Bethlehem Vengthlang te hnehin hmahruaitu an ni leh thei a, an phur vanglai tak a ni.

I League club hian tun inelnaah goal 14 an khung tawh a, goal khung tam lama anmahni hnaih bertu Ramhlun North aiin goal rukin an khung tam zawk a, an khingpui tur Police aiin goal riatin an khung tam bawk.

Tun inelnaa hattrick siam thei awmchhun Lalkhawpuimawia chuan goal ruk a khung tawh a, top scorer a ni mek. Tlarhnungah Lalrinchhana Tochhawng an kawl a, ani hi season liam taa Chhinga Veng treble champion ṭuma captain kha a ni a, a thiamna piah lamah khelmual chhunga hruaitu a ni tel.

AFC hian midfielder ṭha David Lalrinmuana leh Alfred Kemah Jaryan te an kawl a, Ramhlun North aṭanga Lalrinfela an lalut chu an ṭhat pui bawk. Heti khawp hian Aizawl FC hi ṭha mah se Mizoram Police coach thusawi hian engkim a tichiang, Lalbiaksanga Colney chuan, "Duh thlang thei chu ni ila, ka player-te hi ka thlang ang," tiin Vanglaini a hrilh.

Police hian nikum I Day Football best player R. Lalmalsawmtluanga leh Malsawmfela te an kawl a, Jamshedpur nen Sawmfela hian penalty a hlah avangin tun inelnaah goal la khung lo mah se Ramhlun South tlangval hmachhawn hi thil châkawm a ni chuang lo.

BS-a Colney hian Police ṭhat dan ber a zawng chho mek a, match hnuhnung bera Jamshedpur nen an inhnehtawk avang leh hemi hma chiaha Chhinga Veng an hneh loh avangin an ṭhat dan ber a la hmu chhuak lo a, semifinal-ah chuan an insiamrem tawh ngei ang.

Nomawi a pawimawh

Aizawl FC coach Gift Raikhan chuan, "Eng inelnaah pawh nomawi hi a pawimawh. LG Independence Cup-ah hian nomawi kan chawi theih chuan MPL-ah nasa takin min pui ang a, MPL-a nomawi kan chawi leh chuan I League-ah a pawimawh leh ang. Coach chanchin an sawi chuan an nomawi chawi zat a pawimawh ṭhih. Neroca ka enkawl lai khan Manipur chhung inelna CC Meet leh inelna dangah te kan champion a, I League-ah nasa takin min pui a ni," tiin Vanglaini a hrilh.

Mizoram Police coach Lalbiaksanga Colney chuan, "Kan duh ber chu nomawi a ni tawh a, kan chetsual nawn a thiang tawh lo," tiin champion tuma an beih tur thu a sawi ve bawk.

Kum 2002 khan I Day Football-ah Mizoram Police-in Aizawl FC hi 3-2 in an hneh a, hei hi Police-in tualchhung inelna hlu taka nomawi an chawi hnuhnun ber a ni. AFC erawh hemi hnu hian final vawi thum lut lehin kum 2015 leh 2016 te khan an champion.



Share this Post

Login to comment
No Comments