EPL hun a thleng ta Man United mualah Foxes

Premier League 2018/19 season chu zanin dar 12:30 aṭangin khelh ṭan a ni dawn. Match hmasa ber atan Manchester United chuan Old Trafford-ah Leicester City an lo mikhual ang. Kum danga an la tih ngai loh angin season thar aṭang hian Zirtawpni zanah inkhel a awm zeuh zeuh tawh dawn a, hei hi television coverage inremna vang a ni.

Premier League khelh ṭan (1992) hnuah United hian an league match hmasa berah vawi 17 hnehna an chang a, an khingpui te nen vawi li an inhnehtawk bakah ṭum nga an chak lo thung - an elpui dangte nena khaikhin chun anni aia hnehna chang hnem an awm lo.

Inpeih lo United?

Jose Mourinho naute hian season thar inbuatsaih nan Club America, San Jose Earthquakes, AC Milan, Liverpool, Real Madrid leh Bayern Munich te an hmachhawn a, World Cup khelh vangin senior player ṭhenkat an inlan thei lo - an zingah striker Romelu Lukaku leh Paul Pogba te an tel.

An match hnuhnung bera German champion Bayern an hneh loh ṭumin Sergio Romero, Antonio Valencia, Diogo Dalot, Marcos Rojo leh Nemanja Matic te chu hliam vangin an inlan lo a, defender Eric Bailly leh Ander Herrera te thlak an ngai bawk; Foxes lakah United hi an ṭhat dan berin an khelh nghal theih a rinawm loh.

Sanchez hoin

Player ṭhenkhatin pre season training an neih mumal theih loh laiin, forward Alexis Sanchez erawhin tun hnai kum kua chhunga a vawi khat nan training a nei pumhlum ve thung. Arsenal forward hlui hian nikum season chawhnu lam khan United tan match 18 aṭangin goal thum chiah khung mah se, season tharah erawh a theihna tak pholan a tum ang.

Nipui bazarah United hi Mourinho duh angin an che fuh tawk lo, hei vang hian ṭawngkam dengkhawng tak tak pawh a hmang fo mai. He thu buatsaih lai thleng chuan Brazil international midfielder Fred chiah an la lei a, World Cup khelh kum a nih bawk avangin manager duh angin training-na hmunah player an chhah ṭha tawk rih lo niin a lang.

Portuguese manager hian, "Alexis chauh hi attacking player kan neih a ni," ti hialin a lo sawi tawh. Tun kar chhoah erawh Lukaku leh Marcus Rashford ten training an zawm tawh. Amaherawhchu, anni pahnih hi Leicester City lakah minute 90 chhung an khelh nghal theih a beiseiawm rih lo thung.

Mahrez tel lohna

Leicester City player zingah England international Jamie Vardy leh Harry Maguire ten training an zawm tlai bik a, ani pahnih bakah hian Jonny Evans, James Maddison leh Nampalys Mendy te chu an dinhmun a chiang lo bawk - season hmasa nena an danglamna tur lian tak erawh Riyad Mahrez tel loin an khel tawh dawn.

Nikum khan Claude Puel-a'n Foxes tan harhtharna a thlen a, dinhmun hniam taka an awm tawh chu khai chhuakin pakuana a nihpui. Season thar inbuatsaihna erawh an nei ṭha lo, match nga an khelhah ṭum khat chiah hnehna an chang.

Leicester City-in 2015/16 season-a league nomawi an chawi theih nana player pawimawh Mahrez chu Manchester City lakah an chan a, tun hnai season hnih chhunga club top scorer ni thei striker Vardy-a'n training a neih tlai bawk avangin Man United khelmualah point khat an hmuh chuan an vannei a ni ang.



Share this Post

Login to comment
No Comments