Midfielder ṭha, defender ṭha = 1 Croatia

Croatia chakna hnar an sawi apiangin midfield laia Real Madrid midfielder Luka Modric leh Barcelona midfielder Ivan Rakitic hming lam rik a ni ṭhin a, club-a inhal tak player pahnih hi ram tan chuan player inkawp rem ber pawl an ni a, Russia-a midfield inkawpah anni aia duhthlan tur an awm chuang lo.

Croatia manager Zlatko Dalic-a'n 4-2-3-1 formation a hmang ṭhin a, Modric chu number 10 position-ah a dah ṭhin a, hei hi Real Madrid tana a khelh dan ni lo mah se ṭha takin a khel chhuak ṭhin.

Chumi chhanna chu 3-0 ngawta Argentina an sawp ṭum khan kan hmu–goal a khung a, ball erawh match dang zawng aiin a pass tlem a, vawi 42 chiah pass a nei. Dalic-a'n a ṭul hunah erawh Modric a pawt hnung hreh lo.

Russia lakah kha chuan tlema tawlh hnun deuh tir a ni a, pass pawh 102 ngawt a nei. Rakitic a la awm cheu bawk avangin an midfield hi chu a ngaihtuahawm lo tih a chiang a, midfielder pahnih hian an ṭhat dan bera an khelh phawt chuan England-in an tuar ang.

Croatia chanchinbu lar Vecernji List-a ziaktu Tomislav Dasovic chuan, "Croatian player-te ka dah sanna ber chu national jersey an hak a, an inpekna hi a ni," a ti a, Dasovic thusawi dikna chu an khelh dan aṭangin a hriat theih.

England-in tun World Cup-a an hmachhawn tawh zingah Croatia hi team hriam ber tura ngaih an ni a, a awlsam dawn lo. Monaco goalkeeper Danijel Subasic hi tun World Cup-a 'Golden Glove' dawn phu khawpa khel ṭha a ni a, Liverpool defender Dejan Lovren leh Besiktas defender Domagoj Vida te inkawp ṭhat zia sawi hmaih a thiang lo.

Inter Milan midfielder Ivan Perisic leh Juventus forward Mario Mandzukic an la nei cheu bawk. Liverpool, AC Milan, Juventus, Atletico Madrid leh Monaco tana khel phak an ni nawk a, tawnhriat an ngah tawh–Champions League nomawi vawi kua an chawi tawh a, England squad erawhin Europe inelna sang bera champion tawh Gary Cahill chiah an kawl.

Vecernji List-a ziaktu Tomislav Dasovic chuan, "Croatian player-te hi an inkawm ngeih em em vek a, a pawimawh ber chu coach chunga rinna an nghat nasa em em mai hi a ni. Coach Dalic hian an thisen zungzam nen lam a hria a ni," a ti a, a dah sang hle.



Share this Post

Login to comment
No Comments