England - Nomawi an hawn dawn nge an haw dawn?

Mipui rin loh leh beisei loh team khan semifinal an lut ta si a, England-a hla lar ber chu, "It's coming home," tih a ni ta a, World Cup nomawiin kum 1966 hnuah an ram a thlen leh an beisei.

Zanin dar 11:30-ah England hian Croatia nen World Cup semifinal an khel dawn a, khawvelin an inkhelhna tur hmun Kazan Arena lam an hawi ang.

Croatia coach Zlatko Dalic-a'n quarterfinal-a Russia an hneh hnu lawk khan, "England hmachhawn turin kan inpeih hman ang," a ti a, zaninah he team hi an inpeih hman leh hman loh a hriat dawn ta.

English media zingah World Cup semifinal lo thil dang a leng meuh lo a, chutiang bawkin Croatian media lam pawhin he inkhel tur lo hi chu ziah leh sawi tur an hre meuh lo.

Croatian chanchinbu lar tak Sportske Novosti chuan, "Croatia-a lar ber chu Dalic-a ni," tiin an coach aia lar an ramah an awm hrih loh thu an ziak!

Mangṭha 1998!

Croatia hian kum 1998 khan World Cup semifinal an khel a, an ram legend leh tuna Croatian Football Federation president ni ta Davor Suker hoin pathumna an ni–a hnuah erawh group stage bak chhuan tur an nei lo.

Croatia mipui ten an ram football ropui lai an sawi dawn apiangin thawnthu hlui an keu let a ngai ziah a, hmanah chuan... tia bul ṭan an ngai fo–Croatia coach Dalic ngaihdan a ni lo.

Dalic chuan World Cup hma khan, "Thawnthu thar kan ziah a hun tawh a, 1998 sawi fo hun a ni tawh lo," tiin a sawi a, a sawi ang ngeiin thawnthu thar ziak turin hun an nei ta.

Semifinal an lut tih a chian ruala mittui nena an chak lawmtu coach hi Croatian striker Mario Mandzukic chuan fakin, "Dalic hi a zam ngai lo a, a thinrim ngai lo a, rilru hahdam takin a awm fo ṭhin a, amah vanga tun dinhmun hi thleng kan ni," a ti.

Kane? No problem

England tan Harry Kane chu tlarhmaah ṭum dang ang bawkin hmachhuan tur a ni leh dawn. Kum 24 mi striker hian tun tournament-ah goal ruk a khung tawh a, golden boot dawng turin a dinhmun a ṭha hle.

Croatia coach Dalic erawhin English striker hi dan theih a inring a, "Lionel Messi kan dang thei a, Christian Eriksen pawh kan dang. Kane pawh hi kan dan theih ka beisei. Kane hi top scorer ni lai ni mah se Premier League aṭangin Lovren-a'n a hrechiang tawk tawh a ni," a ti.

Dalic-a'n hriat fuh tawk loh erawh a nei. Tlarhnung laia Domagoj Vida nena inkawp Dejan Lovren hian October 2017 khan Kane hi a tawng a, a ngam lo hle. Liverpool chu Tottenham Hotspur lakah 4-1 in a tlawmpui a, Spurs goal hmasa pahnih hi Lovren-a'n Kane a ven hneh loh avanga lut ve ve a ni.

Mahse, World Cup a ni tawh miau a, Russia-a inkhel aṭanga teh tur a nih tawh miau avangin Dalic a ṭawng sual lo. Croatia tlarhnung hian goal li chiah an la chhuah a, a bik takin Lovren leh Vida ten fak an phu.

England tan vanneihna?

Croatia-in last 16-ah quarterfinal lut turin minute 120 an khelh a ngai a, quarterfinal-ah minute heti zat bawk hi an khel. Heti zat minute khelh hian Croatia inkhelah nghawng a neih rin a ni a, England tan vanneihna a ni thei.

Dalic ngaihdan erawh a dang thung. Croatia coach chuan, "Ni ruk liam ta chhung khan kan tha kan hmang nasa em em a, minute 240 ngawt kan inkhelh avangin kan tan buaina a thlen thei tih chu chiang sa a ni.

"Mahse, ngai kan awh leh theih nan kan tih theih zawng zawng kan ti a, England hmachhawn turin kan inpeih hman vek ang," a ti.

Dalic chuan sawi zawmin, "England hian football hmuhnawm tak an pho chhuak ṭhin a, player naupang ṭha tak tak an kawl bawk. Mahse, team ṭha tak kan ni tih hi kan hre ve bawk a, tumah kan hlau lo," a ti a, Three Lions lakah zam a tum lo.



Share this Post

Login to comment
No Comments