Qatar lamah De Jong a kal

Manchester City mid­fielder hlui Nigel de Jong chu Al Ahli tan a khel tawh dawn, Netherlands international hlui hian Qatar club tan hian kum khat daih contract a ziak.

Kum 33 mi De Jong hian season hmasa chaw­hnu lam khan German Bundesliga club Mainz tan khelin match 11-ah a inlan a, a kum a tam deuh tawh avangin inkhelh hautak lohna leh sum tamna lam a hawi niin a ngaih theih.

De Jong hian 2009 khan German club Hamburg aṭangin City a zawn a, Etihad Stadium-a hun a hman chhung hian FA Cup leh Premier League nomawi a chawi hman. Man City bakah Ajax, LA Galaxy leh Gala­tasaray tan te pawh a lo khel tawh.

Ram tana match 81 khel thei De Jong khelhna tur Al Ahli hi season hmasa khan Qatar Stars League-ah pariatna an ni a, August 8 aṭangin an season thar an ṭan leh ang.

Player langsar ṭhen­khatin Europe-a an vang­lai hun an hman zawh hnuah Qatar lam an pan fo a, tun thlatir mai khan Atletico Madrid midfielder Gabi chuan Barcelona midfielder hlui Xavi hnung zuiin Al Sadd a lo pan tawh bawk a ni.



Share this Post

Login to comment
No Comments