Torres-a'n Japanese club a pan

Liverpool leh Chelsea striker hlui Fernando Torres chuan Japanese club Sagan Tosu a pan ta. Atletico Madrid tana a contract neih lai chu season hmasa tawp rual khan a zo tawh a, pawh sei a nih loh avangin a duh lam a hawi thei a ni.

Atletico Madrid aṭanga sei lian Torres hian Spanish club bakah Reds leh Blues tan pawh a khel a, 2012 khan London club hi Champions League nomawi a chawi pui.

England leh Italy (AC Milan) lama hun a hman hnuah Torres hi a hmangaih hmasa Atletico Madrid-ah bawk a kir leh a, May thla a khelh zawh tak Europa League final-ah Marseille an hneh kha a inlan hnuhnung ber a ni ta - bench aṭanga luhtir a ni.

Spain tana World Cup leh Euro­pean Championship chawi thei Torres chuan, "France, Germany leh Spain aṭang ngei pawhin sawmna ka dawng, mahse European team dang tana khelh ka tum tawh lo. Hmun hran hlakah chona thar hma­­chhawn ka duh a ni," tiin a sawi.

Sawi zawmin Torres chuan, "Sagan Tosu hi min ngaih­ventu hmasa zinga mi an ni a, an hmalak dan tur min hrilh chuan min hneh a ni. Japan leh Japanese League hi a ngaih­nawm dawn hlein ka hria a, hmasawn tura an kalkawngah hian tha thawhtu pawimawh pakhat ka nih ve theih ka beisei," tiin a sawi.



Share this Post

Login to comment
No Comments