Southgate, i zunzam maw lo ni a!

September 2016-a England-in Gareth Southgate an lakluh khan manager lailawk atan chauh tih a ni a, Middlesbrough manager ban hnu lakah beiseina a sang lo.

Football Association chairman Greg Dyke meuh pawh a beisei a sang lo, "Kum 2022 hma chu he England team hian hlawhtlinna lian tham kan beisei thei lo ang," a ti a, chu chuan English football dinhmun chiang takin a hrilhfiah.

Mahse, 2018 a thlen meuh chuan Eng­land-in World Cup semifinal an thleng a, Southgate-a'n England a enkawl theih nana Sam Allardyce-a thamna sum lak chungchang chhui chhuaktu Daily Telegraph hnena lawmthu sawi English mipuiin an duh ta zawk!

Hriatthiamna ngah

"Penalty pet goal lotu niha rilru hrehawm duh zia ka hria a, major tournament-a minute zawng zawng khelh kim vek nawm zia ka hria a, World Cup-a kal chunga inkhelh miah loh hrehawm zia ka hre bawk," tih hi Southgate-a ṭawngkam lar tak chu a ni.

English coach hian Euro 1996-ah khan ram tan minute zawng zawng a khel kim vek a, semifinal-a Germany nen an intawn ṭumin penalty shootout-ah a pet goal lo zui a, World Cup 2002-ah inlan miah loin squad-ah a tel bawk.

Player a nih laia a tawnhriat tam tak avang hian player enkawl dan a thiam a, dinhmun hniama awmte chawi kan a thiam a, rilru hnual hnem a thiam a, ram tana khelh hlutzia a hrilhfiah bawk.

Southgate zunzam

British journalist lar John Crace chuan, "Southgate hian mahni tawka induh ve tak player chu a en kan vek a, ram tana inlan ngaihlutu player hlir a thlang khawm a ni.

"Player langsar ber Harry Kane pawh en ila, England tana a inlan thei hi a inchhuang ngawih ngawih a ni," tiin an ram coach chu a fak a, Southgate chu mi hriatthiamna ngah, player-te pawhin inbun ruah nana an hman ngam niin a sawi - hei hian team boruak a siam ṭha hle.

Hliam a neih avanga depression nei Danny Rose chuan, "England team hi min chhan chhuaktu an ni a, coach leh medical staff-te hnenah lawmthu sawisen loh ka ba a ni," tiin Southgate-a puihnaah lawmthu a sawi.

Tunah hian...

Southgate fak a nihna chu fan-te tan hun a siam a, player-ten Russia-a anmahni ṭawiawmtute hnenah lawmthu an sawi fo bawk. A chang chuan dressing room aṭanga chhuakin fan-te thla an lakpui hial ṭhin. 

English coach hian tawnhriat ngahna aiin theihna, thiamna, inpekna leh rinna a ngaihlu zawk a, a squad hruai hi Russia-a team 32 zinga kum chawhrual naupang pathumna an ni hial.

Mahse, he England team, squad puan tirh a niha ram tana an inlan zat belhkhawm pawh 465 bak ni lo hian semifinal hial an thleng ta si. Southgate chuan, "Tun aia hun duhawm hi kan nei tawh kher lo ang," a ti a, nomawi chawi a tum. Ni e, World Cup semifinal meuh thleng leh tur chuan an nghah rei a ngai tawh mai thei asin.

Hlim rawh u; nui rawh u!

England defender Kyle Walker chuan an ram fan-te chuan an tawrh hnem tawk tawh thu sawiin Croatia hneh ngei an tum thu a sawi.

Walker chuan, "Fan-te hian an tuar hnem tawk tawh. Hlim hmel an lo hloh tawh kha pek let kan duh a, England zunah hian uai leh vek se kan duh a ni," a ti. 

Manchester City defender chuan Southgate fak nghalin, "A hma kha chuan ram tana inkhel ve satliah ang mai kan ni a, tunah chuan engkim a inthlak tawh. Coach hian fak a phu a ni," tiin a sawi.



Share this Post

Login to comment
No Comments