Ka nu leh ka farnu awm lo se min hre lo ang – Raheem Sterling

England jersey number 10 hmaah Sweden keeper Robin Olsen chiah bum tur a awm tawh mah se a bum thei lo. Kum 1986 khan Diego Maradona chuan England lamah a khalh tlang a, goal ropui a khung. Argentina jersey number 10 hian Three Lions lamah hian khung ta lo se tumahin an dem lo ang, amaherawhchu Sweden lama hlahtu England winger erawhin dem a hlawh.

A chanchin kan sawi mek hi Raheem Sterling a ni a, kum 23 leka upa hian media sawiselna hlawh pha tur hian kawng thui tak a zawh a. Feet nga leh inches 7 leka sang nichungin England innghahna a ni pha a, ram tana number 10 ha pha a nih bawk avangin sawiselna chu han tawng ve bawk mah se footballer hlawhtling tiha chhiar theih a ni tawh.

Tun hun thleng thei turin Sterling hian hun harsa a patlang a, Manchester City winger hian a zinkawng ama sawi ngei hi chhiar rawh le.

Chanchinbua ka chanchin inchhiar ṭhin aṭangte hian min hre tawhah in inngai a ni thei a, amaherawhchu min hre tak tak em? Ka chanchin ka sawi dawn a, min ngaihthlak sak rawh le.

Pan lai nun

Kum hnih mi lek ka nih laiin ka pa an that a, hei hi ka nun dan phung thlaktu chu a ni. Hemi hnu hian ka nu chuan thutlukna siamin kei leh ka farnu chu Jaimaica-ah min dah a, hmalam huna nuamsa zawka kan awm ve theih nan degree neih tumin England min pan san thung.

Kum engemaw chhung chu ka pi bulah kan khawsa a, naupang dangte an nute nena an awm ho ka hmuh chuan min tilungchhia a, ka thik bawk. Ka nuin min kalsan hi ka hrethiam lo a, ka pi hi fel hle mah se kan kum angah kha chuan mi zawng zawngin an nu te kha an thlahlel a ni.

Football chuan ka nun khawhar min hnem a, ruahsur karah pawh naupang dang nen hlim takin kan infiam ṭhin. Ka pan lai nun duhawm tak hi Jamaica ka hriat reng dan pawh a ni a, England-a ka hmuh ve loh 'grapenut ice cream' tui zia kha ka theihngilh thei lo bawk.

Hetih hunlaia ka hriatthiam loh ka nu hian nun khaw chhuah nan rim takin a thawk a, kan nawm sak nan hun a hmang.

England-ah an pem

Kum nga mi ka nih chuan England-ah ka nu kan fin a, nun dan phung a inthlak avangin ka tan chuan hun harsat lai ber a ni. Ka nu chuan kan mamawh ang chu min tihsak vek a, sum erawh kan ngah lo a, nuam saa khawsa erawh kan ni pha lo hle.

Ka nu chuan degree a neih theih nana a sum mamawh hlawh chhuak turin hotel tih fai hna a thawk bawk a. Ka farnu nen nen zing dar ngaah kan tho ziah a, school kal hmain Stonebridge-a hotel kan tihfai pui ṭhin.

Primary school ka kal ṭantirh khan kawhmawh bawl ka ching ṭhin a, ka nu rilru ka tihah ve ṭhin hle. Zirtirtute thusawi ngaihthlak a, ṭhut ngawih reng hi har ka ti a. Sana enin chawlh lawk hun chu ka thlir a, a rawn thlen chuan chaw tlem eiin pawnah chhirh diak karah Ronaldinho khelh dan entawnin kan inkhel a, chu zawng chu ka ngaihtuahna chu a ni ber.

Ka nungchang a ṭhat loh avangin ka primary school kalna ka thlak a ṭul a, ka nu bulah ven ulukna zawkah a ṭul thu an hrilh a. Ka school tharah chuan classroom khatah naupang paruk awmin zirtirtu pathumin min veng a, bum theih rual an ni lo.

Hrehawm ka tih ber lai erawh bus in min rawn lam a, min thlah leh vek a, school naupang dang an duh dan danga an kal chu ka awt ṭhin hle. Naupang sual bikah ka inngai lo a, ka nu thu chiah ka awih lai chu enkawl ka buaithlakna lai a ni.

Arsenal aiah QPR

Kum khat hnuah chuan ka nun thlakin school pangngaiah chuan ka kal leh ta a, ka nun thlak danglam ṭanna erawh Clive Ellington nen kan intawn aṭangin a ni a. Ani hian pa nei lo te chu hmangaihna nen a enkawl a, kartawpah London-ah min hruai kual a, a chang leh snooker te min khelh pui ṭhin.

Ṭum khat chu ka ngainat zawng min zawt a, 'football' tihin ka chhang. Hetihlai hian kawngpuiah te ka inkhel ṭhin. Tichuan Clive chuan Sunday League-a tel ve turin min sawm a, chuta ṭang chuan kan nun chu football, football, football a ni tawp tawh a, football zunzam chuan min man nghet thlat.

Kum 10 leh 11 mi ka nih chhoh chuan London club lian ho chuan min rawn hmu ṭan ta a, Fulham-in min duh a, Arsenal-in min duh bawk. Arsenal-in min duh chiah chuan ṭhiante bulah pawh hmai a uang a, London club lian ber ka zawm tur thu chu intithei takin 

ka sawi.

Ka nu ngaihdan erawh a dang a, ani chuan, "Ka hmangaih che. Mahse, Arsenal zawm turin ka duh lo che," tiin min hrilh a. Mak ti taka ka en let chuan, "I zawm a nih chuan nangmah ang bawka thiam 50 rual an awm dawn a, player pakhat ve chauh i ni dawn. Chuvangin hma i sawn theihna tur zawn a ngai," tiin min chhang.

QPR zawm turin ka nu chuan min hmin a, thutlukna ka siam tawhah chuan ka siam fuh ber a la ni hial ang.

Unau inhmangaihna

QPR-ah chuan duhsakna pawh ka dawng a, amaherawhchu ka nuin keimah chauha training-naa kal a phal loh avangin kan chhungkua erawh kan buai phah hle. Hna a thawh avangin ka farnu chuan kan in aṭanga Heathrow thleng chu min hruai ṭhin.

Tlai dar 3:15-a kan chhuak hi zan dar 11:00-ah inah kan thleng leh ṭhin a, ka farnu chuan nitinin sawisel loin min hruai ṭhin. Ka training neih lai zawng chuan a bula thingpui dawrah chuan a lo nghak ngat ngat mai ṭhin.

Tihian ngaihtuah ta la, kum 17 mi chauh a ni a, a phunnawi ka hre ngai lo. Tun hnu hian ka tana a inpek nasat zia hi ka hre chauh a. Ka nu leh ka farnu ten ka tana an inpekna avangin tun hun hi thleng thei ka ni a, anni awm lo se min hre lo ang.

Wembley thlir chungin

Wembley Stadium thar an sak lai hi kan in hnung lam aṭangin ka thlir thei a, ṭum khat ka hawi chhuak chu stadium chungah chuan thil kual lian pui chu a lo awm.

In kawta ka inkhelha goal ka khung te chuan Wembley chung kual hnua goal khung ang maiin ka lawm ṭhin a, engtik niah emaw chuan he stadium-ah ngei hian goal ka khung theih hi ka ring tlat a ni.

Mi zawng zawng min beisei pui lo a, kum 14 mi ka nih chuan zirlai ka ngaihtuah tawk loh avangin zirtirtu chuan, "Raheem, football hi i tawpna tur emaw i inti elo? naupang maktaduai chuang pawhin footballer nih hi an duh a sin?"

"Chutiang te chu ka hre fo tawh alawm," tiin ka ngaihtuah a, ka chhang hran lo. Ani chuan rawn sawi chhunzawmin, "Eng nge i danglam bikna?" tiin min rawn cho leh a. Kei rilrua chhanna rawn lang chuan, "Kan hria ang chu," a ti a, mahse ka chhang lo.

Thla hnih hnuah chuan England U16 team-ah koh ka ni a, Nothern Ireland nen kan inkhelh ṭumin goal hnih ka siam sak a, TV bakah kan inkhel chanchin chu hmun hrang hrangah a darh a. Thawhṭannia school ka kal leh chiah chu vawi leh khatah kan ziritirtu chu ka ṭhian ṭha ber a ni.

A hlawhtling ta

Ka nu thlak danglamna tak tak erawh kum 15 mi ka niha Liverpool ka zawm aṭang chiahin a ni a. Ka nu leh farnuin ka tan hun an hlan a, chuvangin risk ka lak a ṭul a ni.

Kum hnih chhung chu football chauh ngaihtuahin ka awm bo a, ka ṭhiante ka thlah a ṭul. Ka nu erawh kan chawlh amah hmu turin London-ah ka let ṭhin. Reds-in kum 70 chho nupa bulah min dah a, an tupa ang chiahin min duat a, chuti chung chuan ka nu chuan zing tinin ka ṭawngṭai em min zawt a, malsawmna ka dawn avanga lawmthu ka sawi em tih min zawt thlap ṭhin.

"Aw, ka nu, ka ṭawngṭai e," tih chu ka chhanna a ni ṭhin. Tichuan contract ka ziak ve ta a, ka nu leh ka farnu te an hah lutuk a ngai ta bik lo. Ka nu tan in ka lei sak ṭum chu ka nuna ka hlim ber ṭum a ni hial ang.

Hetia kan chhungkaw mamawh ka lei lai hian media lam chuan tlereuh leh lunghlu ka lawm thu bakah insawi thei angin min chhuah a. Ka nu bulah pawh ka vui ve hial.

Mahse tihian ka inhnem a, ka nu ina a bathroom chanchin an ziak duh a nih chuan a ṭha lam a ni. Kum 15 liam ta kha chuan hotel-ah toilet kan tifai ṭhin kha a ni a, tunah chuan engkim a danglam tawh.

Ka nu hian engmah nei loin he ramah hian a rawn lut a, bathroom tifai leh bed sheet thlak ṭhin kha nursing home-ah director a ni tawh a. A fapa pawh World Cup England tan a khel tawh a ni.



Share this Post

Login to comment
No Comments