Wilshere-a'n West Ham a pan

Jack Wilshere chuan kum 17 chhung a cham chilh tawh Arsenal a chhuahsan hnuin West Ham a zawm fel ta, England international hian Hammers tan kum thum daih contract a ziak a, kar khatah £100,000 vel a hlawh ang.

Kum 26 mi Wilshere hian June thla tawp rual khan Gunners tana a contract neih lai a hmang zo. North London club-ah hian hun rei tak awm hman mah se hliam a neih ngun a vangin a inkhel tam tawk lo, match 197 khel sakin FA Cup vawi hnih a chawi pui hman.

Arsene Wenger thlaktu Unai Emery rawn lan hnuah Wilshere tan beisei tur a tlem zual a, contract ṭha zawk zawrh a ni lo bawk. Wilshere-a'n inkhelh tam theihna tur hmun a melh a, a naupan laia a ṭan tawh ṭhin West Ham lam a hawi – Switzerland lamah pre season training camp nei turin a zin chhuak zui ve nghal ang.

England tana match 34 khel tawh Wilshere chuan, "He club ka zawm thei hi a hlu hle, ka naupan lai khan Upton Park-ah West Ham inkhel hi enin ka lo ṭan em em tawh ṭhin a ni, kan chhungte leh ṭhian ṭhenkhatte pawh West Ham fans an ni," tiin a naupan laia a club ṭan tawh ṭhin a zawm thu a sawi.

West Ham manager Manuel Pellegrini-a'n Wilshere hma hian Issa Diop, Lukasz Fabianski leh Ryan Fredericks te an lalut tawh bawk a, Ukraine forward Andriy Yarmolenko chu Borussia Dortmund aṭangin an lalut hnai bawk. Chilean coach kaihhruaina hnuaiah hian season lehpeka European football khelh phak an tum.



Share this Post

Login to comment
No Comments