Set hloh lo a tlang Federer

Wimbledon champion lai Roger Federer chuan set khat mah hloh loin quarterfinal a inhlangkai leh ta. World number 1 Rafael Nadal pawh 2011 hnu lama a vawi khat nan a thiam pariat zingah a inhlangkai ve bawk.

Zanin hian quarterfinal khelh zui tur niin, seeded pakhatna Federer hian South African tlangval Kevin Anderson a hmachhawn leh ang. Nadal khingpui tur erawh a la chiang lo, Juan Martin del Potro leh Gilles Simon te inkhela a chak zawk nen an inkhel ve leh thung dawn.

Roger-a class

Thawhṭanni zan Centre Court-a inkhelah kum 36 mi Federer hian Adrian Mannarino chu darkar khat leh minute 45 chhung lekin 6-0, 7-5, 6-4 in a hneh a, All England Club-ah hian a zawnin set 32 zet a la tawh.

Swiss star Federer hian 2005-2006 chhung khan Wimbledon-ah hian a zawnin set 34 a lo la tawh a, a record siam sa a hnaih leh tawh hle. Kuminah hian a champion leh thei a nih chuan Martina Navratilova nih rualin Wimbledon singles title vawi kua la thei pahnihna a ni ang.

Grand Slam vawi 20 champion tawh Federer chuan, "Tun hma lama thil thleng tawh ka ngaihven ber lo a, hnehna chan hi chuan a lawmawm. Chutih rualin set hloh loa hnehna chan hi chu duhthusam a ni thung, tournament khelh laia thahrui khekna ṭha tak a ni," tiin a sawi.

Quarterfinal-a Federer khingpui tur seeded 22-na Anderson hian Gael Monfils chu 7-6 (7-4), 7-6 (7-2), 5-7, 7-6 (7-4) in a lo hneh ve bawk. Federer leh Anderson te hi tum hma lamin vawi li an inkhel tawh a, Federer-a'n hnehna chang vekin kum 32 mi Anderson lakah hian set a la hloh miah lo bawk a ni.

Hei le Nadal

World number 1 Nadal-a'n French Open nomawi a chawi hnua a tournament hmasa ber atan Wimbledon a khel a, Spanish tlangval hian beisei aiin a khel ṭha–Jiri Vesely laka a match point vawi thum hmuhna hmang ṭangkaiin 6-3, 6-3, 6-4 in a chak. Hnehna chang tur hian darkar khat leh minute 53 bak a mamawh lo.

Grand Slam vawi 17 champion tawh Nadal hian 2008 leh 2010 khan Wimbledon title hi a la tawh a, grass court inelna lianah hian a hlawhtling chhunzawm lo; 2011 hnua quarterfinal a luh lehna hmasa ber chauh a ni. Vesely lakah Nadal-a'n tihsual a nei tlem a, a ball vuak a naiin a service a ṭha bawk–aces vawi kua siamin a service vawi khat chiah a hloh a ni.

Kum 32 mi Nadal chuan, "Kum khat chhung grass-ah ka inkhel lo a, chumi hnuah a zawna match ṭha tak vawi li ka khel thei hi a lawmawm hle. Vesely khan baseline aṭanga min beih dan a hre hle mai a, a khelh dan hmang kan man chinah erawh harsatna ka nei lo," tiin a sawi.

Djokovic pawh

Grand Slam vawi 12 champion tawh Novak Djokovic chuan Karen Khachanov lakah 6-4, 6-2, 6-2 a hnehna changin a vawi 10 nan Wimbledon quarterfinal a lut. Serbian tlangval hian a match lehpekah chuan Japanese star Kei Nishikori a hmachhawn leh dawn.

Nishikori hian world number 138 Ernests Gulbis chu 4-6, 7-6 (7-5), 7-6 (12-10), 6-1 in a lo hneh ve bawk a, Milos Raonic pawhin world number 103 Mackenzie McDonald chu 6-3, 6-4, 6-7 (5-7), 6-2 a hnehin a zawna a season thum nen quarterfinal a lut ve bawk.

Canadian tlangval Raonic hian Stefanos Tsitsipas 6-4, 7-6 (7-5), 7-6 (7-4) a hnehtu John Isner nen an inhmachhawn leh dawn a ni. Del Potro leh Simon te inkhel erawh set thumna an zawh hnuin eng ṭha lo (bad light) vangin an chhunzawm thei lo, nizan khan an hmabak hi khelh chhunzawm niin he thu buatsaih lai hian result kan hre hman lo a ni.



Share this Post

Login to comment
No Comments