World Cup-in Messi hma hun hril dawn

Argentina captain Lionel Messi chuan ram tan engtik thleng nge a khelh dawn tih a sawi lawk thei lo a, chutihrualin World Cup-a an ram thlen chin chuan a hma hun a hril thui tur thu a sawi.

Zawhna chhangin Messi chuan, "Eng tianga thui nge kan thlen dawn tih leh, khawiah nge a hnu kan khar dawn tih a pawimawh. Inelna lianah a zawnin pahnihna kan ni a, thuthar lakhawmtute'n zawhna min zawh fo hi chu Russia World Cup zawhah a fel duak ang," tiin a sawi.

World Cup hnuhnung berah khan Argentina hi pahnihna an ni a, nomawi inchuhna inkhelah Germany chu 1-0 in an ngam lo. 2014 World Cup hma hian a zawnin Copa America final-ah Chile an hneh lo tawh bawk.

Russia World Cup an khelh laiin Messi hi kum 31 a tling tawh dawn a, a tan major tournament hnuhnung a ni thei tawh. South Amercian ram hian player nei ṭha viau mah se a indah sang duh lo a, Spain, Brazil, Germany, France leh Belgium te chu champion thei an nih thu a sawi.

Barcelona forward Messi chuan, "Team ṭhenkhat chu inrintawkna sang tak nen an kal dawn, player mal khai ṭha tak tak pawh an awm dawn a ni," tiin inelna hautak a nih tur thu a sawi a, champion thei zingah an tel thu a zep tel bawk.

World champion vawi hnih ni tawh Argentina hian an match hmasa ber atan Inrinni zanah Iceland an hamchhawn dawn. World Cup khel zinga ram te ber Iceland bakah Group D-ah hian Croatia leh Nigeria te nen an inel chhunzawm bawk ang.



Share this Post

Login to comment
No Comments