Nice manager thar Vieira

Arsenal captain Patrick Vieira chuan Lucien Favre thlakin Nice manager thar a ni. French Ligue 1 club tan hian eng chen nge contract a ziah tih tarlan a ni lo a, a hna thar chu chona hautak a nih tur thu a sawi.

Player a nih laia Manchester City, Inter Milan leh Juventus tana khel tawh Vieira hian season thum chhung chu New York City a enkawl hman a, hlawhtling taka a khelh tawhna Arsenal enkawl tura sawi ni mah se Gunners lamin Unai Emery an la zawk.

Kum 41 mi Vieira chuan, "New York chhuahsan tura thutlukna siam hi kei leh ka chhungte tan chuan a harsa hle," a ti. Assistant coach Christian Lattanzio, performance coach Kristian Wilson leh physical performance coach Matt Cook te chuan Vieira hi Nice lamah an zui vek a ni.

Season hmasa khan Nice hi Ligue-1 lamah pariatna an ni a, point khat lekin Europa League an khel phak lo. May thla khan an manager Favre chuan Bundesliga club Borussia Dortmund a zawm san a, a hmun ruak luah tur hian Viera an lalut thung.

Vieira a chhuah vangin MSL club lamah hna ruak pakhat a awm zui nghal a, Pep Guardiola nena kum 11 zet hna thawk dun tawh Manchester City assistant manager Domenec Torrent chuan New York club hi a enkawl thung dawn a ni.



Share this Post

Login to comment
No Comments