Inrintawkna nen England-in Russia an pan

"Fan-te rinna kan hlawh let leh tawh a ni," tiin England coach Gareth Southgate chuan a sawi a, Three Lions hian nimin khan Russia panin England an chhuahsan.

England hi World Cup Group G-ah Belgium, Panama leh Tunisia te nen an awmho a, an hmabak erawh a awlsam dawn lo. Belgium hi champion beisei ngam an ni a, Tunisia leh Panama hian England barakhaih turin theihna an nei.

World Cup champion tura rinkai zingah England tel lo mah se boruak nei lian ber erawh an ni chiang a, an boruak neih an umphak ang em tih chu mipui hriat chak a ni.

Ennawm ropui

England manager Southgate chuan, "Pawisa tam tak senga kan inkhel en turin mipui kan beisei a, an beisei ang ngeia inkhel hmuhnawm phochhuah ve hi kan tum tur chu a ni," tiin a sawi a, inkhel hmuhnawm phochhuah an tum.

Southagte ṭawng a lian a, a player ten an umpha kher ang em tih zawhna a awm leh bawk - an pu thusawi hlawhtlin tir turin theihna erawh an nei tih a chiang a, Harry Kane, Dele Alli, Marcus Rashford, Raheem Sterling leh Kyle Walker te telna team hi team chhia an ni thei lo.

England-in 3-4-3 formation chu an hman uar ber a ni a, he system hnuaiah hian result an nei ṭha hle. Southgate-a'n he formation hmang hian World Cup-ah a naute a khelhtir rin a ni a, ṭum danga an khelh ṭhin anga he system hi an khelhchhuahpui thei a nih chuan Belgium, Tunisia leh Panama lakah harsatna an tawk lo ang.

3-4-3 maw?

Southgate-a'n tlarhnung laiah defender pathum a dah ṭhin a, wing back pahnih chu tlarhnung leh hma lam pui tura 'inring' reng turin a dah ṭhin. Tlarhnungah hian Kyle Walker leh John Stones chu khel chiang tura ngaih an ni a, defender pahnih dinpui turin ball kanga hlauhawm tak Gary Cahill leh Leicester City defender Harry Maguire chu hmun inchuh tura ngaih an ni.

Wingback anga chhawr turin Trent Alexander-Arnold, Kieran Trippier, Ashley Young, Fabian Delph leh Danny Rose te a nei a, Young leh Trippier chu Russia-ah inkhel bul ṭan ṭhin tura beisei an ni a, Arnold ṭhatzia Liverpool-ah kan hmu tawh a, Delph erawh friendly match-a a chhawr dan enin wing back ai chuan midfield chu Southgate-a'n a chhawrna tur zawk niin a lang.

Midfield laia Southgate-a'n pklayer a remkhawm dan tur hi hmuh chakawm a ni bawk. Eric Dier leh Jordan Henderson chu defensive midfield anga tawlh hnung hreta ding dun tura ngaih an ni a, tlarhmaah Harry Kane leh Raheem Sterling/Marcus Rashford pui turin Dele Alli nge Jesse Lingard lut zawk ang tih chu Southgate lu tihaitu zinga mi a ni thei bawk.

Hmabak tam tak

March 26, 2017 hnuah England-in tlawm hmel an hmu leh tawh lo a, hetih chhung hian match 10 an khel hman. World Cup khelh hmaa inbuatsaihnaah Russia pan ve tur tho Nigeria leh Costa Rica an hneh thei a, an inringtawk viau a nih pawhin a awm lohna a awm lo.

England coach Southgate erawh a ṭawng fimkhur a, player a nih laia Three Lions tana match 57 khel thei manager chuan, "Kan hna kan la zo lo nasa a, hnathawh tur tam takin min la hmuak a ni. Ka naute hian ram tana khel phak nih hi an ngai hlu a, England tana theihtawp chhuah duhna thinlung an pu a ni," a ti.

Three Lions tan captain Harry Kane chu tlarhmaah innghahna a ni dawn a, Tottenham striker hian England tana a match hnuhnung pasarihah goal riat a khung - a chet ṭhat leh ṭhat lohin England dinhmun thui takin a hril ang. Jamie Vardy leh Rashford an la awm bawk tih theihnghilh loh a ṭha.

Panama & Tunisia

Squad leh team dinhmun en mai aṭang pawhin England leh Belgium chu awlsam taka last 16 lut tura ngaih an ni a, Three Lions nge Red Devils-in group hmahruaitu dinhmun luah zawk ang? tih chu inzawhna tur niin a lang.

Hetihrual hian football-ah chuan eng pawh thleng thei a ni a, player hming langsar vang maia Panama leh Tunisia thaibo nghal ngawt hi thil harsa tak a ni. Panama tana hriat nuam lo erawh tlarhnung innghahna Roman Torres chu hliam damkawr nei chungin a inlan dawn a, MLS club Seattle Sounders defender khelh ṭhat leh ṭhat loh hian an dinhmun tur thui takin a hril ang - ram tana goal 43 khung thei pahnih Blas Perez leh Luis Tejada an nei tih erawh theihnghilh loh a ṭha.

Tunisia-in World Cup inbuatsaihna inkhelah Portugal leh Turkey an inhnehtawkpui a, 0-1 in Spain ngam lo mah se minute 84-naa goal khungtu Spain vanneih ṭum an tawn vang chauha chak lo an ni - England leh Belgium barakhaih turin an ṭha tawk. He team hian player langsar tia sawi vul tur nei lo mah se team anga an thawhhona ṭha chu an hmachhuan tur a ni.



Share this Post

Login to comment
No Comments