Goal khung thiam Belgium an inpeih

Belgium-in goal khung turin harsatna an nei lo tih an pholang a, World Cup khel tura an inpuahchahna match hnuhnung berah World Cup khel ve tur tho Costa Rica chu 4-1 in an sawp.

Red Devils tan Romelu Lukaku chuan goal hnih a khung a, Dries Mertens leh Michy Batshuayi ten goal an khung ve ve bawk. Belgium coach Roberto Martinez tan tlarhmaa goal khung tura a beisei ten goal an khung vek hi thil hmuh nuam tak a ni ngei ang a, England tan 'vaukhanna' a ni thung ang.

Costa Rica goal neihchhun hi Bryan Ruiz a khung a ni a, si li ngawta Belgium-in an vuak let avangin 2014-a quarterfinal an luh kha chhunzawm tur chuan insiamṭhat an mamawh hle ang.

Hmuhnawm Belgium

Belgium-in inkhel hmuhnawm tak pho chhuak mah se chesual hmasa zawk erawh Martinez-a naute hi an ni. Tottenham Hotspur defender Jan Vertonghen chuan chhe zetin ball a pet chhuak a, Sporting Lisbon forward Ruiz chuan goal-ah a lo chantir.

Red Devils an talbuai phah lo, an hmuhnawm sawt a, Eden Hazard, Kevin de Bruyne leh Mertens ten Costa Rica tlarhnung an rum ṭhaih fo a, hmuhnawm ti taka an khelh dan entu tan chuan 'world champion hlimthla' hmuh ang mai a ni - an thiam takzet.

Goal an chhuah aṭanga minute sarihna lekah Mertens hian an si phurh a sut a, Hazard-a ball pet per a ke bula tla chu Napoli forward hian awlsam takin goal-ah a chantir.

Lukaku a bon!

Mertens-a'n a pet goal hnuah Lukaku pet goal tur a siamsak ve leh a, Manchester United striker hian a volley goal - minute 50-naah a goal hnihna a tauh lut a, Batshuayi goal khung tur chu mahni hmasial lo takin a siamsak bawk.

Kum 25 mi striker hian sawisel tawk ṭhin mah se ram tan match 69 a inlanah goal 36 a khung ta a, a kum zat ngaihtuah chuan ram tana a goal khung tawh zat hi tam tak a ni. 

Hei mai a ni lo, Lukaku hian ram tan a match hnuhnung vawi 27-ah goal 25 ngawt a khung tawh a, World Cup-ah a khelh ṭhat hi a chhunzawm a nih ngat chuan 'champion' an beiseina hi holam takin a ral lo tawp ang.

Hazard a inhliam!

Belgium tan hliam vangin defender Vincent Kompany a la inlan thei lo a, Brussels-a inkhelah hian hliam vang bawkin Eden Hazard chu lak chhuah a ni. Mahse, Belgium fan-te hlauhthawnna tihrehin a awm nghal a, manager Martinez chuan a player pawimawh hi a ngaihtuahawm loh thu a sawi.

Everton boss hlui chuan minute 70-naa lakchhuah a forward chungchang sawiin, "Hliam ngaihtuahawm a ni lo. Hazard khan a khel ṭha takzet a, a hriamin a chak ṭha a, a hmuhnawm hle a ni," a ti a, June 18 zana an World Cup match hmasa berah Panama a hmachhawn theih a beisei.

Belgium coach hian AS Roma midfielder pawimawh Radja Nainggolan chu a squad-ah a ko lo ngam a, hetichung hian Russia-a team ṭha ber pawl an la ni lo - KDB, Hazard, Mertens, Lukaku, Jan Vertonghen, Toby Alderweireld leh Thibaut Courtois te ho an neih avangin Group G-a an awmpui England, Panama leh Tunisia tan hna a awlsam lo ang.



Share this Post

Login to comment
No Comments