WC-ah VAR hman a ni dawn

FIFA World Cup-ah vawi khat nan Video assistant referee (VAR) hman a ni dawn a, he technology hmang tur hian football dan siamtu International Football Association Board (IFAB) chuan March 3, 2018 khan thutlukna an siam a, March 16, 2018 khan Colombia khawpuia FIFA Council chuan a pawmsak.

World Cup 2018-ah hian substitution vawi li a siam theih dawn a, knockout round aṭang chiaha hman ṭan tur a ni thung. Hun pangngai (minute 90 ) chhung chu substitution pathum aia tam siam phal a ni chuang lo a, extra time-ah substitute palina hi tlan luh tir theih chauh a ni ang.

Eng nge VAR?

Video assistant referee (VAR) hi referee-in thutlukna a siamna kawnga pui tura siam a ni. VAR hi a hnuaia tarlan paliah chauh hian hman theih a ni.

Goal : Goal luhna tur kawngah dan bawhchhiatna a awmin.

Penalty : Penalty chungchanga thutlukna siam nan.

Direct Red card : Red card pek theih tur enfiah nan hman theih a ni a, yellow card a huam lo.

Player hriat sualah : Referee-in player ni lo zawk red card emaw yellow card hmanga a hremin.

Engtin nge a thawh dan?

* VAR-in head referee hnenah headset kaltlangin thutlukna ennawn a ṭul tur thu an hrilh ang.

* Inkhel an titawp ang a, referee-in ennawn a nih tur thu lantir nan boruakah a kutin 'rectangle' (kil li nei) a ziak ang.

* VAR-in replay a en ang a, head referee hnenah an hmuh dan an hrilh ang.

* Referee-in VAR aṭanga thu a hmuh hnuah chi thumin thutlukna a siam thei ang.

1. A thutlukna siam sa chu a thlak danglam nghal ang.

2. A thutlukna a kaltlang pui ang.

3. Referee-in mual sira TV hmangin amah ngeiin replay a en ang a, chumi zawhah thutlukna a siam ang.

* Thutluknaah chiang taka tihsual a awm chauhin thutlukna an thlak ang.

* Thutluknaah sawisel kai a awm a nih chuan inkhelh ṭan leh hma ngeiin VAR a inrawlh thei ang.

* Player emaw coach zingah VAR hmang tura referee nawr lui an awm a nih chuan a hrem thei ang.

* VAR hian chawhrualin minute 90 inkhelah minute 2.5 hun a la.

An her danglam hret

Belgian university KU Leuven chuan VAR hian competive match 1,000 hmangin inelna an zirchiang a, he zirna aṭanga teh chuan VAR thutlukna 93% - 98.8% a dik a, a hlawhtlinga ngaih a ni.

Thiamna a sang zel a, offiside en dawn pawhin 3D hmangin a en theih dawn a, boruaka lu hmanga offside pawh dik thlapa en theih a ni tawh dawn. 

Kumin World Cup-ah hian thutlukna siamna tura graphic pawimawh lai chu Stadium leh TV lama entu tan phochhuah a ni dawn. VAR-ah hmasawnna awm chho zel mah se an thutlukna siam danah hun a duh tho avangin a boruak nawmna tur a tinepa ngaih a ni a, duh lotu leh sawiseltu an la tam hle.



Share this Post

Login to comment
No Comments