Senegal-in South Korea an ngam

Croatia lakah 2-1 in tlawm mah se Senegal chuan World Cup-ah tih mai mai an tum lo tih pholangin Russia pan tura an inbuatsaihna hnuhnung berah South Korea chu 2-0 in an hneh.

South Korea defender Kim Young-Gwon chuan an lamah ti lut palhin Senegal hmahruaina goal a khung sak a, hun pek belhah Moussa Konate chuan penalty aṭangin an goal hnihna a khung ve leh bawk.

Senegal hian June 19 zanah Poland chu World Cup-a an match hmasa ber an khelhpui dawn a, Japan leh Colombia an hmachhawn chhunzawm ang. Senegal hian an group-a an khelhpui tur hisapin friendly match an khel a, an result ngaihtuah chungin last 16 luh an inbeisei ngam ang.

South Korea hian World Cup khelh hmaa friendly match pathumah chak hmel an hmu miah lo a, Senegal laka an tlawm hma hian Bolivia inhnehtawkpuiin Bosnia&Herzegovina lakah 3-1 ngawtin an tlawm a, Group F-a Mexico, Sweden leh Germany awmna aṭanga knockout round lut tur chuan an insiamṭhat a ṭul ang.



Share this Post

Login to comment
No Comments