Marseille hmaah Atletico

European club inelna sang pahnihna Europa League 2018 chu zanin hian a hmawr bawk a ni dawn. Parc Olympique Lyonnais, France-ah Marseille leh Atletico Madrid ten nomawi an inchuh dawn a, inkhel ṭan hun hi dar 12:15 niin Sony Ten 2-ah en theih a ni ang.

Europa League champion hian season tharah Champions League an khel dawn. La Liga pahnihna Atletico Madrid hi an league aṭanga tling phak sa an ni a, an khingpui tur Marseille erawh palina ni lai an nih avangin an dinhmun tur a la chiang lo.

Team pahnihte hi tun hmain vawi hnih chiah an la intawng a, Atletico Madrid lamin vawi khat hnehna changin vawi khat dang chu an inhnehtawk–Marseille tan nomawi chawi tur chuan tun hma lama an tih theih ngai loh tih a ngai dawn tihna a ni.

Final chauh

"Champions Legaue final khelha nomawi chawi si loh ai chuan Europa League champion nih ka duh zawk," titu Diego Simeone nau ten a vawi thum nan champion an tum dawn a, 2010 leh 2012 champion hian a lungthu kim nan nomawi chawi an tum dawn.

Atletico Madrid manager Simeone chuan, "Hmalam ka thlir a, ka mitin thil dang reng a hmu lo a, ka beng pawhin thil dang a hre lo–final chauh lo chu," tiin Europa League final bak ngaihtuah a neih rih loh thu a sawi. Semifinal-a Arsenal nen an inkhelh ṭuma a nungchang mawi lo vangin Simeone hi hrem mek a ni a, khelmual chhungah a naute a ho thei dawn lo.

Argentine manager kaih-hruaina hnuaiah Los Rojiblancos (Atletico sawina) hian 2014 August thla khan Spanish Super Cup an chawi a, a hnuah nomawi an la chawi leh lo. Barcelona leh Real Madrid ten ro an relna hmun La Liga team hlauhawm ni thei hi rinkai ni chungin an inlan ang.

Hun hnuhnung

Season tawp rualin Fernando Torres a chhuak dawn a, Atletico hian an captain hlui thlah nan Europa nomawi an duhna a sang zual hle. Torres bakah kum 34 mi Gabi, right back Juanfran (33) leh central defender Diego Godin (33) te tan hun hnuhnung ber ni kher lo mah se hun hmawr chu a ni tawh chiang.

Barcelona nena sawi zawm Antoine Griezmann leh hma hun chiang lo goalkeeper Jan Oblak te tan pawh inkhel pawimawh bik a ni dawn. France international Griezmann hian nomawi lian tham chhawi a la nei lo a, tun hnaiah Catalan club pan tur anga sawi a nih avangin Atletico tana a title hmasa ber leh hnu-hnung ber a ni nghal thei bawk.

Atletico Madrid-in hliam vanga semifinal-a an chhawr theih loh defender Luis chu an chhawr thei tawh dawn a, an tlarhnung khawng tak tiphui zualtu Oblak chu an thlamuanpui leh tur a ni dawn. Atletico hian tun season league match bikah goal 20 chiah an la chhuah a, champion Barcelona (29 goals) ai pawhin record an nei ṭha zawk.

Tlarhnung a phui ṭhat rual chiahin hmatawng pawh an nei ṭha. Chelsea striker hlui Diego Costa-a'n Arsenal lakah chakna goal a khung a, Emirates Stadium-a goal pawimawh khungtu Griezmann nena an inkawp hi Ligue 1 club tan dan a harsa hle tura ngaih a ni.

A hot dawn

Marseille hian tun hmain European Cup final vawi li an khel tawh a, ṭum khat chiah a chak zawkah an la ṭang. 1993 khan AC Milan hnehin Champions League nomawi an chawi a, hemi hnuah erawh hlawhtlinna an chang chhunzawm leh thei rih lo.

Tun season Europa League quarterfinal-ah RB Leipzig an hneh a, semifinal-a Red Bull Salzburg an paltlang leh chiah khan fans tam takin boruak an siam nghal. League lama an elpui Lyon president Jean-Michel Aulas hnenah "In mualah lam kan rawn thai dawn," tiin an lo va sawi lawk tawh.

Inkhel en tur hian Marseille fans 11,500 bawr vel chu Groupama Stadium chhunga lut tura ngaih an ni a, heti chung hian sang tam takin Lyon khelmual hi an pan dawn tih a chiang. Marseille aṭangin final khelhna tur hmun hi motor hmangin darkar thum kal chauh a ni; venhim hna thawk turin police officer ringawt pawh 1,250 an awm dawn.

Kum 25 hnuah

French club zinga Champions League nomawi chawi thei awmchhun Marseille-in hlawhtlinna an chan aṭang a kum 25 cham chiahah hun ṭha an nei leh a, rinkai lo zawk ni mah se an beiseina hi holam taka thamral tir an tum dawn lo.

Dimitri Payet chuan, "Engtiang taka harsa nge a nih dawn tih chu kan hria, chuti chung chuan kan chak a nih chuan sulhnu ziahna buah kan hming a chuang ve reng tawh dawn," a ti. Defender Rolando pawhin, "He club sawi rual hian AC Milan lama goal awmchhun khungtu Basile Boli kha rilruah a lo lang ṭhin," tiin UCL final-a chakna goal khungtu an la hriat reng thu a sawi.

France international Payet hi Marseille tan innghahna a ni dawn. West Ham midfielder hlui hian semifinal-a an goal pathum chu a siamsak vek a ni a, tun season Europa League bikah assist vawi sarih nei tawhin record nei ṭha ber a ni–a ke aṭang ball chhuak dang turin Atletico tlarhnung an inrin a ṭul ang.



Share this Post

Login to comment
No Comments