Kum khat atan Minerva Punjab neitu an hrem

Indian football barakhaihtu lian tak a thleng a, Minerva Punjab neitupa Ranjit Bajaj chu referee lakah mawi lo taka a ṭawng avangin kum khat chhung atan hrem a ni.

All India Football Federa­tion (AIFF) chuan I League champion club neitupa hi kum khat chhung atan an hrem bakah nuai 10 chawi turin an ti bawk a, Indian football-ah chuan inhremna na ber pawl a ni. 

Ranjit Bajaj hi a pawisa chawi pe tur hian ni 10 chhung hun pek a ni a, AIFF disciplinary committee chuan, "Hun tiam chhunga pawisa hi a pe lo a nih chuan a pek tlak hma a hremna hi kalpui a ni ang," an ti.

A thlen dan

Jawaharlal Nehru Stadium, Shillong-ah Hero I League Under 18 playoff khelh a ni a, Minerva Punjab leh Aizawl FC an intum - team pahnih hi 1-1 in an inhnehtawk a, Mizo club hian injury time-ah an si phurh sutna goal hi an khung.

Inkhel entu zinga mi Miner­va neitu Ranjit Bajaj a lungawi lo a, mawi lo takin referee Pynskhemhame Mawthoh chu chi inthliarna lam hawiin a ṭawng khum. He thil thleng hi match commissioner chuan AIFF hnenah a thlen.

AIFF disciplinary commit­tee chuan, "Uluk taka kan ngaih­tuah hnuah Bajaj hian dik lo takin thil a ti ngeiah kan ngai a, hei vang hian nuai 10 chawi bakah kum khat chhung football kaihhnawiha inhnamhnawih lo turin kan hrem a a ni," an ti.

Engtin maw?

Shillong khawpuia inkhel hi Ranjit Bajaj hian a hmunah a en a, a sulhnua thil thleng duhawm lo tak tak lo hnutchhiah tawh Bajaj hian referee hi an room-ah a luhchilh!

Aizawl FC U18 coach H. Lalnun­zira chuan, "Kan goal khung kha hun pek belh a ni tawh a, inkhel boruak pawh a sang hle. Referee chunga lungawi lo Bajaj kha referee room-ah a lut a, chi inthliarna lam hawi zawng ṭawngkam kha a hmang a ni," tiin Vanglaini a hrilh.

AIFF thuchhuah chuan, "Bajaj hi misual rothap ang maiin a che a, ṭawngkam mawi lo tak a hmang a, chi inthliarna lam hawi a hmang a, hei hi sports club neitu hnen aṭangin kan beisei lo," an ti. 

Minerva lam

Ranjit Bajaj hrem a nih avangin Minerva Punjab an lungawi lo a, Punjab club co-owner leh director ni bawk Henna Singh chuan na takin twitter lamah AIFF chu a kap.

Henna chuan, "Club lian lo tak, mahse a kalphungin mi a hip em em si hian tun season-a a nomawi palina a chawi hnuah mi ṭhenkhat kalphung a sawi nghing a, chu chu mi ṭhenkhatin a tihtawp dan an zawng ta a ni," a ti!

Minerva Punjab hian tun season-ah rin loh takin I League nomawi an chawi a, age level inelna hrang hrangah an champion bawk - Henna Singh chuan hei hian AIFF hruaitu ṭhenkhat mit a ti mim niah a ngai.

A thar lo

Indian football-ah chi inthliar­na hi thil thar a ni bik lo a, India rama striker hlawhtling ber pawl lo ni tawh Ranti Martins chuan, "A chang chuan Nigeria-a haw mai ka rilruk ṭhin," tiin India rama chi inthliarna a tawrh nasat thu The Wall Street Journal hnenah a lo sawi tawh.

Player langsar zingah Mumb­ai FC striker hlui Yusif Yakubu leh Cornell Glenn chu chi inthliarna avanga ṭawngkhum lo tawk tawh an ni a, Indian Super League khelh zawh takah khan NorthEast United fan-te chu Chennaiyin fan pakhatin mawi lo taka a lam khum lai hmuh tur a lo awm tawh bawk.

India-in coach a neih tawh zinga hlawhtling ber pawla chhal Bob Houghton pawh kha chi inthliarna lam hawia referee a ṭawngkhum avangin buaina a lo tawk tawh a, 2011 khan amah zawkin a banna a thehlut a ni.

A tlipna

AIFF Hero I League U18 hi Aizawl FC chuan qualifier aṭangin an khel ṭan a, Rest of India Zone Group A-ah Tata Football Academy, Neroca, Sports Hostel Odisha, Fateh Hyderabad leh Ananthapur Sports Academy te khumin point hmu sang ber chungin playoff an inpet tling.

Playoff-ah pawh hian Kerala Blasters, Minerva Punjab leh SAG Football Academy te nen an awmho leh a, group hmahruaitu bawk niin final round an lut. Mizo club hi Shillong Lajong FC, FC Goa leh Ozone Football Academy-te nen Group D-ah an awm ho leh a, May 17, 19 leh 21-ah te match an khel ang.

Final round-ah hian team 16 chu group pali-ah team pali zel awmin ṭhen hran an ni a, group hmahruaitu ṭheuhin semifinal an lut dawn a ni.



Share this Post

Login to comment
No Comments