Warriors danglamna Durant

Nimin zing khan Houston Rockets-in Western Conference finals game 1-ah Golden State Warriors an mikhual a, champions lai GSW-in an mikhualna hmunah 119-106 in hnehna an chang. Game 2 hi Ningani zing dar 6:30 hian Toyota Center-ah an khel ang.

Eastern Conference finals game 2 chu tukin zing dar 6:00 hian TD Garden-ah Boston Celtics leh Cleveland Cavaliers ten an khel dawn a, game 1-ah Celtics-in 108-83 in hnehna an chang.

A nung nghal

Western Conference regular season-a pakhatna Rockets leh NBA champion lai Golden State te inkhel hi a hmuhnawm tura ngaih a ni a, rinlawk ang ngeiin inkhel a nung nghal.

Boruak a ṭang nghal a, James Harden chuan Kevin Durant bumin a lay up a, ball lo chhartu Golden State center Dramond Green chuan ṭul lo takin Harden hi nghawk luiin technical foul an pe. Hemi hnu hian chet dan mawi lo a awm zui lo a, game mawi leh shooting ṭha an lantir ve ve. Team pahnih an intluk tawk a, halftime-ah 56-56 a ni.

Durant a vul

Golden State tan Klay Thompson (28 pts) leh Stephen Curry (18) te a kawl a, an pahnih ai hian Kevin Durant a la langsar. Warriors guard Durant hian point 37 zet a nei a, third quarter bikah NBA champion lai hi 31-24 in an sang a, Rockets an tho chhuak tawh lo.

Ṭum dang ang thoin Houston tan James Harden erawh a khel ṭha a, point 41 neiin Chris Paul-a'n point 23 nei bawk mah se team anga che ṭha zawk Golden State Warriors an dingchang.

Warrios coach Steve Kerr chuan, "Ball in pek kual kan duh a, chutihrualin in pek fuh tawk loh a awm a. Chutiang hunah chuan Durant a pek tawp theih a, engkim a rawn chingfel a ni," tiin Durrant a fak.



Share this Post

Login to comment
No Comments