PSG coach thar Thomas Tuchel

Paris St-Germain chuan season thar aṭanga an team enkawl tur an ti chiang ta, a hming chu Thomas Tuchel a ni. German manager hian French champion hi season hnih chhung enkawl turin contract a ziak–season tawp ruala chhuak tur Unai Emery a thlak dawn a ni.

Kum 44 mi Tuchel chuan, "Football club lian leh ṭhangduang Paris Saint-Germain ka zawm thei hi ka lawm hle. Player ṭha chungchuang tak tak nena hna kan thawk tur hi ka phur tawh takzet. Ka thawhpuite nen a ṭha thei ang berin sang tak thlen kan tum dawn a, ka tana chona phurawm leh hautak a ni dawn," tiin a sawi.

May 2017 khan Tuchel hian Borussia Dortmund enkawl hna a kalsan hnuah team enkawl hna a la thawk leh lo a, kum khat chhung vel hna a thawh loh hnuah chona thar a hmachhawn dawn. German Cup vawi khat a champion bak nomawi lian la chawi lo tan kawng awlsam tak a nih a rinawm loh.

PSG president Nasser Al-Khelaifi chuan, "Thomas hi tun hnaiah chuan European coach ṭha berte zinga mi a ni a, khelmual chhunga a naute a khelhtir dan phung mawi leh hmuhnawm tak bakah, a rilru huaisen tak chu Paris St-Germain hian a hmuh hmaih lo," tiin an coach thar lakah beiseina an neih san tur thu a sawi.

Tuchel sulhnu

Jurgen Klopp thlaka Dortmund a enkawl tirh khan Tuchel-a'n atan hna ṭha chungchuang a nih thu a sawi a, a hmangaih Dortmund tan German Cup a lak hnu phei chuan fans ngainat a hlawhin European club lian dangte pawhin an hnena kal turin an duh hle.

Amaherawhchu, Tuchel hian player lian leh langsar awmkhawmna Bayern Munich a tluk theih loh avangin Bundesliga nomawi a chawi lo–Champions League khel turin tling mah se kum hnih hnuah club nena inhriatthiam tawnnain a chhuak.

German manager hi Dortmund a enkawl lai chuan mahni khelmual hmangthiam tak a ni. Signal Iduna Park-ah khan season hnih chhung chu league match bikah tlawm an nei miah lo, a zawnin match 27 hnehna an chang thei a, vawi sarih chu an khingpuite nen an inhnehtawk bawk. PSG mual Parc des Princes chu mikhual tana lenluh chak awm lohna tur tak a nih a rinawm.

Player ṭha a neih sa a chhawr thiam, Pierre-Emerick Aubameyang-a'n season khata goal 40 a khung theih nana kaihruaitu hian Barcelona forward hlui Neymar a hrual dawn–French player of the year bakah hian striker hriam tak Edison Cavani a nei tel dawn bawk.

Tuchel hi a ṭha sa bakah la ṭha leh tur chherchhuah kawngah pawh a ngaihtuahawm loh. Ousmane Dembele (21years), Julian Weigl (21) leh Christian Pulisic (18) te tana hmun siamtu a ni a, anni hi khawvel hriatah an langsar tawh; Paris club tana khel lai Kylian Mbappe tan kaihhruaitu ṭha tak a nih theih ngei beisei a ni.

Mangṭha Emery

A zawna Europa League nomawi vawi thum chawi thei Unai Emery-a'n beiseina sang tak nen 28 June 2016 khan Paris Saint-Germain a pan a, kum hnih daih contract a ziak. Ligue 1, French Cup leh League Cup te chawi thei mah se PSG neitu ten an duh ber Champions League-ah erawh a thlak tak Laurent Blanc ang bawkin a hlawhtling thei lo.

Arab sumdawng hausa sum hmanga siam len PSG hian hun hmasa lamah pawh UCL chawipui thei lo manager an ban tawh ṭhin a, an duh zawng player lei nan sum an hman hreh loh ang bawkin an duh ber tih hlawhtlin sak thei lo manager chhuahtir an hreh lo–Emery hi ban ni lo mah se a contract an pawhsei sak duh loh vanga chhuak tur a ni.

A hma hun sawiin kum 46 mi Emery chuan, "Football hi ka hmangaih a, he infiamna chungchang hrechiang leh hmathlir nei ṭha ka laina hnaite nen kan sawi khawm hnuah ka kal zel dan tur chu a hriat ang. Team ka enkawl leh tur pawh ngun takin zir chianna ka nei hmasa leh phawt dawn a ni," tiin a sawi.



Share this Post

Login to comment
No Comments