World Cup khel lo tur Peru captain

Peru captain leh ram tana goal khung hnem ber ni bawk Paolo Guerrero chu FIFA World Cup-ah a inlan thei dawn lo. Damdawi hman phal loh a hman avanga thla ruk hrem lai Guerrero hi thla 14 atan hremna tih sei sak a ni.

Kum 34 mi Guerrero hian nikum October 6 khan Argentina nen World Cup qualifier an khelh ṭumin cocaine a hmang tih hmuhchhuah a ni a, a tirah chuan kum khat chhung atan hrem a ni.

FIFA hnuaia committee pakhat chuan hrem a nihna hi an ngaituah hnuah an ti tawi, a lan dan chuan May thla tawp hian rawn kir tura ngaih a ni. Mahse, World Anti-Doping Agency (WADA) chuan infiamna lama thubuai ngaihtuahtu sang ber Court of Arbitration hnenah damdawi hman phal loh hmangte chu kum hnih hrem tura a ngen miau avangin Guerrero tan kawng a harsat phah.

CAS chuan Flamengo striker Guerrero hian a duh vang rengin dan a bawhchhia niin a hre lo, a thingpui inah cocaine hi a tel palh mai niah ngaiin, kum hnih hrem loin thla 14 atan a hrem ta zawk a ni. Ram tan match 86 a khelh aṭanga goal 32 khungtu tan a mumang rama a hmuh ṭhin World Cup chu beiseina ang maiin a thamral.

Peru hian playoff-ah New Zealand hnehin kum 1982 hnua a vawi khat nan World Cup an khel dawn. Group C-ah France, Australia leh Denmark te nen an awmkhawm a, an match hmasa ber atan June 16 zan dar 9:30-ah Denmark nen an intawng dawn a ni.



Share this Post

Login to comment
No Comments