Serena chungah coach-in rinna a nghat

Serena Williams-i coach Patrick Mouratoglou chuan tun thla tawpa khelh tur French Open a thlirlawk a, a player hian clay court inelna lianah hian hlawhtlinna a chan theih a beisei thu a sawi chhuak.

Grand Slam vawi 23 champion tawh Serena hian 2016 khan French Open nomawi a chawi a, hemi hnuah hliam a neih bakah fa a neih avangin clay court-ah a la inlan leh lo–tun hnaiah Madrid leh Rome Open aṭangtein a inhnukdawk a, atan Roland Garros hi a awlsam a beiseiawm loh hle.

A player chungah rinna a la nghah thu sawiin Mouratoglou chuan, "Serena hian hlawhtlinna a la chang leh thei. A thawkrimin hma pawh a sawn leh tawh hle a, Roland Garros atan a inpeih hman ngei ka beisei," tiin a sawi.

Kum 36 mi Serena hian fa a neih avangin thla ruk chhung chu tennis khelh a chawlhsan a, March thla khan rawn kir ve leh mah se beisei angin a la khel chhuak leh lo. A tawn san berah pawh Indian Wells-ah third round lut ve mah se a unau Venus Williams a ngam lo a ni.

Mouratoglou chuan sawi zawmin, "A nihna takah chuan Serena kha a rawn kir hma deuh hlek a, 100% a inpeih lo chungin a rawn kir a ni. Tunah chuan hlawhtlinna chang tura thawhrim a ngaih zia a hre chhuak thar leh tawh, kawng hrang hrangin hma a sawn leh tawh hle a ni," tiin a sawi.



Share this Post

Login to comment
No Comments