Brazil-in World Cup squad an puang

World Cup 2018 khel turin ram ṭhen-khatin preliminary squad an puang a, Brazil coach Tite erawhin player 23 an hruai tur a puang fel der.

Hliam vanga inkhel thei lo mek Neymar chu player 23 koh zingah a tel a, kar hmasa lawka inhliam PSG right-back Dani Alves erawh World Cup a khelh theih loh tur thu tihchian a nih hnuah squad-ah hian telh a ni lo.

Brazil squad-ah hian player langsar zingah Chelsea defender David Luiz leh Manchester United nena sawizawm, Juventus left back Alex Sandro te chu koh zingah hian an tel lo a, Russia-ah an hmel kan hmu dawn lo.

World Cup-a vawi nga champion tawh Brazil hi Group E-ah Costa Rica, Serbia leh Switzerland te nen an awmho dawn a, June 17 zanah an match hmasa ber chu Switzerland nen an khel ang.

Premier League rorelna

Brazil squad-ah Premier League-in ro an rel a, player paruk ngawt koh an ni. Spanish La Liga chu Premier League dawta player thawh hnem an ni a, player panga an thawh.

Serie A, Brazilian Serie A leh Ligue 1 ten player pathum ṭheuh an thawh a, Ukrainian Premier League aṭanga player pahnih telin Chinese Super League-in player pakhat an thawh ve bawk.

Neymar hi 100%-a a in fit hman a nih chuan Brazil player langsar ni tura beisei a ni a, Philippe Coutinho, Gabriel Jesus leh Roberto Firmino te chungah beiseina a sang bawk ang.

Luiz tel lohna

Antonio Conte hnuaia hmun pawimawh chang phak lo David Luiz-a'n Chelsea tana a khelh phak loh a tuar a, tun season-a inelna hrang hranga match 17 chiah la khel defender hi 2014 World Cup-ah player pawimawh ni mah se kuminah erawh a tan hmun a awm lo.

Chelsea aṭanga Shanghai SIPG a pan hnua, "World Cup ka khelh leh khelh lohah ka buai lo. Kum tam tak ka nih hnuah 'World Cup ka khel asin' ti chunga retheih ka duh lo," titu Oscar chu squad-a koh zingah a tel lo a, kum 26 mi hi 2014-ah kha chuan FIFA World Cup All-Star Team-ah a tel.

CSL khel zingah Oscar bakah SIPG tana a khelhpui Hulk chu CSL lamah player langsar an ni chungin Brazil team-ah an tan hmun a awm lo. Liverpool aia Jiangsu Suning thlangtu Alex Teixeira leh Shandong Luneng striker Diego Tardelli tan hmun a awm lo bawk. Hetihlai hian CSL khel zingah Beijing Guoan midfielder Renato Augusto chu koh zingah a tel thung.

Langsar lo

Brazil squad-ah khawvel huap hriat hlawh goalkeeper aṭanga tlarhma an kat nuk a, hetih karah hian Europe-a hriat hlawh lo hmuh tur erawh an awm ve tho.

Corinthians right back Fagner Conserva Lemos hi Brazil tana vawi li chiah la inlan a ni a, season hmasa khan Brazil Serie A Team of the Year-ah a tel a, Luiz te koh an nih loh laia koh Pedro Geromel hi kum 32 mi ni tawhin Brazil tan vawi hnih chiah a la inlan.

Europe-a South American player-te zinkawng ang hiala ngaih Shakhtar Donetsk-in player pahnih an thawh a, midfielder Fred leh attacking midfielder Taison te hi hriat hlawh tak an la ni lo–Russia-ah an chet 

ṭhat phawt chuan season tharah European club lianah kan hmu ang.

Tite thusawi

Brazil coach Tite-a'n, "Alisson; Marcelo, Miranda, Marquinhos, Dani Alves; Paulinho, Renato Augusto, Casemiro, Neymar, Coutinho leh Gabriel Jesus-te hi ka starting XI tur an ni," tiin a lo sawi tawh a, Brazil squad a puannaah erawh a ngaihdan a thlak thung.

Tite chuan, "A tirah chuan Gabriel Jesus hi inkhel bul ṭan tura kan beisei kha a ni a, mah se Firmino hian tun ang renga a khelh chuan Jesus hi a nek chhuak lo ang tih a sawi theih loh," a ti a, Liverpool tan tun season-a goal 27 khung tawh Firmino tan starting XI-ah hmun a awm thu a sawi.

Brazilian coach hian hliam vanga Alves a chhawr theih dawn tak lohah chuan right back lamah pawh chhawr tur a ngaihven a ṭul dawn tihna a ni a, Corinthians full back Fagner emaw Danilo ten Alves hmun ruak hi an inchuh ang.

Ruahmanna chu

Russia-a khelh tur World Cup-a Brazil khelh dan turah Tite a ṭawng chhuak nghal a, engmah a zep hran lo. South American coach lar chuan, "Coutinho-a'n midfield laiah a khel thei a, a sir lamah buaina pawh a nei lo. Khawi hmunah pawh khel thei player a ni," a ti.

Tite hian 4-3-3 a hmang tlangpui a, tlarhmaah Firmino/Jesus chu mual sir 

aṭangin Neymar leh Willian ten an thlawp ang. Coutinho hi a laiah a khel a nih chuan Renato nek chhuakin Paulinho nen an inkawp a rinawm a, an hmuhnawm khawp ang.

Kum 56 mi coach chuan a pawimawh ber chu team anga khelh ṭhat a nih thu sawiin, "Neymar-a'n a khelh ṭhat chuan kan ṭha dawn tih a chiang a, a pawimawh ber erawh chu kan vaia kan khelh ṭhat a ni," tiin a sawi.

Brazil squad

Goalkeepers:

Alisson (Roma), Ederson (Manchester City), Cassio (Corinthians).

Defenders:

Danilo (Manchester City), Fagner

(Corinthians), Marcelo (Real Madrid), Filipe Luis (Atletico Madrid), Thiago Silva, Marquinhos (both PSG), Miranda (Inter Milan), Pedro Geromel (Gremio).

Midfielders:

Casemiro (Real Madrid), Fernandinho (Manchester City), Paulinho (Barcelona), Fred (Shakhtar Donetsk), Renato Augusto (Beijing Guoan), Philippe Coutinho (Barcelona), Willian (Chelsea), Douglas Costa (Juventus).

Forward:

Neymar (PSG), Taison (Shakhtar Donetsk), Gabriel Jesus (Manchester City), Roberto Firmino (Liverpool).



Share this Post

Login to comment
No Comments