Premier League-ah City an dang

Champions League-ah Liverpool hneh loin Manchester City an tla a, Premier League-ah erawh Europe-a an result ṭha lo dah ṭhain Tottenham Hotspur chu 3-1 in Wembley Stadium-ah an sawp.

City tan Gabriel Jesus-a'n minute 22-naa goal hmahruai a khung a, English forward Raheem Sterling-a'n minute 22-naah penalty a hlawh chhuak a, Ilkay Gundogan-a'n goal-ah a chantir.

Christian Eriksen hmangin Spurs-in minute 42-naah an siphurh sut ṭhen mah se minute 72-naah Sterling-a'n chak nemnghehna goal a khung.

City nge nge

Tunlai hi Spurs chet ṭhat lai a ni a, December thla laihawl aṭangin league-ah hneh loh an tawng leh tawh lo.

Mauricio Pochettino hote hian Manchester United, Arsenal leh Chelsea te an hneh thei a, Liverpool nen an inhnehtawk. Amaherawhchu an insiamṭha tawh viau ang a lan hnuah December 16-a an hneh loh City tho an hneh lo nawn.

Spurs-in home match an khelhna Wembley Stadium hmang thiam tawh mah se City erawh an ṭhat hret avangin point an hmuh an phu lo a, chak phu zawkin hnehna an chang.

City hian Spurs bakah London club ṭha Chelsea leh Arsenal te chu khualmualah an hneh vek a, 2013-14 season-a league nomawi an chawi khan heng club pathum bakah West Ham an hneh bawk a, London club pali hneh turin Hammers chiah an hneh a ngai tawh.

An champion dawn

Manchester City-in match 33-ah point 87 an hmu tawh a, anmahni hnaih bertu Manchester United aiin point 16 in an sang tawh zawk. Pep Guardiola hote hian champion turin vawi khat chak an la mamawh a, nizan lama United-in West Brom an hneh thei lo a nih chuan tun Pathiannia Swansea nen an intum leh hma hauhin an champion dawn tihna a ni.

Manchester City boss Pep Guardiola chuan, "Minute 10-15 kan khelh khan ka thawhpuite bulah 'kan champion dawn' tih ka hrilh a, Champions League-a kan chak loh zawh kan khelh chhuah leh danin minti lawm hle a ni. Etihad Stadium-a min ṭantute hmaa champion turin theihtawp kan chhuah ang ," tiin a sawi.

Pep-a'n United lam a ngaihtuah tawh lo a, Spanish manager chuan, "Kei chuan United inkhel en loin ka fapa nen golf kan khel dawn. United an chak ang. Kan stadium ngeia champion kan duh avangin an kutah kan awm tawh a ni," tiin Swansea hneh chung ngeia champion a duh avangin United chak turin a duh.



Share this Post

Login to comment
No Comments